MDH mamlakatlarida istiqomat qiluvchi va konsullik ro‘yxatida turgan O‘zbekiston fuqarolari uchun 2020-yil 1-martdan boshlab ushbu mamlakatlardagi diplomatik vakolatxonalar va konsullik muassasalarida xorijga chiqish uchun biometrik pasport olish imkoniyati yaratildi. Bu haqda O‘zbekiston Tashqi ishlar vazirligi xabar berdi.
Ma’lum qilinishicha, Respublika fuqarolari xorijga chiqish uchun biometrik pasportni olish va qabulga yozilish (biografik ma’lumotlar va biometrik parametrlarni topshirish) uchun https://consulate.mfa.uz veb-portali orqali elektron ariza to‘ldirishi mumkin.
Shuningdek, vazirlik tomonidan xorijiy mamlakatlarda pasport rasmiylashtirish tizimini bosqichma-bosqich tatbiq etish ustida ish olib borilmoqda va uning natijalari to‘g‘risida vatandoshlar o‘z vaqtida xabardor qilinadi, deyiladi vazirlik xabarida.
Bundan tashqari, 1-martdan boshlab https://consulate.mfa.uz veb-portalida konsullik ro‘yxatiga olish interaktiv tizimi joriy etilgan bo‘lib, buni fuqarolar masofadan turib O‘zbekistonning chet eldagi diplomatik vakolatxonalari va konsullik muassasalariga shaxsan kelmasdan amalga oshirish mumkin.
Izoh (0)