Jizzaxlik 8 yoshli bola buvisiga bo‘layotgan tahdidlar sababli odamlardan yordam so‘rab videomurojaat yo‘llagan. Bolaning mazkur murojaati O‘zbekiston Senati a’zosi tomonidan o‘rganildi. Bu haqda Senat tomonidan ma’lum qilindi.
Xabar berilishicha, Senatning Yoshlar, madaniyat va sport masalalari qo‘mitasi tomonidan 2020-yil 23-fevral kuni 8 yoshli Muhammadali Sultonovning YouTube tarmog‘i orqali yo‘llagan video murojaati joyning o‘ziga borib o‘rganilgan.
Qo‘mita a’zosi, senator Sanobar Suyarova bolaning uyiga shaxsan borib, vaziyat bilan atroflicha tanishgan. Ma’lum bo‘lishicha, Muhammadali Sultonov Jizzax viloyati Jizzax shahri Yoshlik mahallasida buvisi Husniya Salohiddinova bilan istiqomat qilib kelmoqda. Bola 7 oyligidan beri uning onasi Aziza Salohiddinova Rossiyada yashaydi. Muhammadali Jizzax shahridagi xususiy maktabining 2-sinfida to‘lov asosida o‘qiydi.
Bolaning buvisi Husniya Salohiddinovaning so‘zlariga ko‘ra, 2016-yilda Jizzax shahar hokimligining inson huquqlarini himoya qilish bo‘limi xodimi Alisher ismli shaxs o‘z uyini ularga sotish vaji bilan ulardan 4 ming dollar va 2 million so‘m pulni aldov yo‘li bilan olgan. Keyin esa Alisher ishidan bo‘shab, qochib ketgan. Shundan so‘ng Husniya Salohiddinova Alisherni sudga bergan. Sud qarori bilan Alisher aybdor deb topilgan hamda pullarni qaytarish bo‘yicha tilxat yozib bergan.
Sud qaroridan so‘ng bolaning buvisiga nisbatan turli tahdidlar boshlangan. Xususan, 2020-yil 10-yanvar kuni u noma’lum shaxslar tomonidan tibbiy ko‘rikdan o‘tish bahonasida ruhiy kasalliklar shifoxonasiga olib ketilgan, ruhiy kasal ekanligi bahonasida 3 soat ushlab turilgan. Biroq tekshiruvdan so‘ng uning aqliy va ruhiy jihatdan sog‘lom ekanligi isbotlanib, uyiga qaytarib yuborilgan. O‘sha kundan beri Muhammadali buvisining ruhiy kasalliklar shifoxonasiga olib ketilishi mumkinligidan qo‘rqib, maktabga bormayotganligi aniqlandi.
Ushbu masala senator tomonidan shahar hokimi bilan atroflicha muhokama qilingan. Natijada mablag‘ni undirish bo‘yicha Majburiy ijro byurosiga ko‘rsatma berilgan. O‘rnatilgan tartibda Husniya Salohiddinovaga moddiy yordam ko‘rsatish masalasi o‘rganiladigan bo‘ldi. Shuningdek, senator Sanobar Suyarova Muhammadali o‘qiyotgan maktab direktori bilan gaplashib, uning bepul ta’lim olishga erishdi.
Izoh (0)