AQShda aeroport va uylarni vayron qilgan, o‘nlab odamlar o‘limiga sababchi bo‘lgan tornado oqibatlari (foto)

AQShning Tennessi shtatiga yopirilgan tornado oqibatida kamida 25 kishi halok bo‘ldi. Bir necha odam bedarak yo‘qoldi, uylar, binolar vayronaga aylandi.

3-mart kuni tunda yopirilgan tabiiy ofat shtatning markaziy qismi bo‘ylab hakatlanib, Neshvill shahriga ulkan talafot yetkazgan. Bu vaqtda aksariyat odamlar uyquda bo‘lgan.

Neshvillda 48 ta inshoot qulab tushgan, 150 kishi shifoxonaga yotqizilgan.

AQSh prezidenti Donald Tramp halok bo‘lganlarning oilasiga hamdardlik bildirdi va 6-mart kuni tabiiy ofat yuz bergan hududga borishini ma’lum qildi.

Neshvill markazidan 13 km uzoqlikda joylashgan Jon K. Tyun aeroporti sezilarli darajada zarar ko‘rdi.

AQShning janubi-sharqida tez-tez vayronkor quyunlar sodir bo‘lib turadi. Bir yil avval Tennessidan janubroqda joylashgan Alabama shtatida bir necha kuchli tornado tufayli 23 kishi halok bo‘lgandi.