Ijtimoiy tarmoqlarda Qashqadaryo viloyati Mirishkor tumani hokimi Baxtiyor Rajabovga tegishliligi aytilayotgan audioyozuv tarqaldi. Ta’kidlanishicha, voqea tuman hokimi va mahalla raislari ishtirokidagi yig‘ilishda bo‘lib o‘tgan. Audioyozuvda hokim yig‘ilish ishtirokchilarini pul tushumlarini o‘z vaqtida ta’minlamagani uchun turli so‘zlar bilan haqoratlagani va so‘kkani, shuningdek, ba’zilarni urgani eshitiladi. Oliy Majlis Qonunchilik palatasi deputati Rasul Kusherbayev o‘zining Telegram’dagi kanali orqali mazkur voqeaga munosabat bildirdi.
Qashqadaryo viloyati Mirishkor tumani hokimi kim bo‘lishidan qat’i nazar rahbarlikka nomunosib, uquvsiz, bilimsiz, tuban inson ekanligini namoyon etibdi.Avvalroq Mirishkor tumani hokimi Baxtiyor Rajabov “Daryo” muxbiri bilan bo‘lgan muloqotda ijtimoiy tarmoqlarda tarqalgan ovoz unga tegishli ekanligini tan olib, mazkur qilmishini mahalla raisining bepisand muomalasi bilan izohlagan edi.Bu inson o‘zining bugungi O‘zbekiston kelajagini qurib bo‘lmaydigan va Prezident obro‘sini to‘kadigan kaltafahm, pastkash shaxs ekanligini namoyon qildi.
O‘rtoq ushbu “inson”ga aytar gapimiz: tinchgina o‘rinni bo‘shatib, hech kim eshitmaydigan dala-dashtda istagancha baqirib yuraverishi. Agar o‘simlik va dov-daraxtlar gapini eshitsa shunda ham. Xullas, bor-e... Sizdaqalarga vatanni qolgan kuni qursin...
Rasul Kusherbayev, Oliy Majlis Qonunchilik palatasi deputati
Eslatib o‘tamiz, Mirishkor tumani sobiq hokimi Ravshan Komilov dala maydonidan makkajo‘xori olayotgan otaxonni haqoratlagani uchun tanilgan va keyinroq bu ishi uchun uzr so‘ragan. Mazkur voqeadan ko‘p o‘tmay Ravshan Komilov o‘z lavozimidan ozod etilgan va uning o‘rniga amaldagi hokim Baxtiyor Rajabov tayinlangan. Mazkur tayinlovgacha viloyat hokimining qishloq va suv xo‘jaligi masalalari bo‘yicha o‘rinbosari bo‘lib ishlagan Baxtiyor Rajabovga so‘nggi imkoniyat berilgan edi.