Ijtimoiy tarmoqlarda Qashqadaryo viloyati Mirishkor tumani hokimi Baxtiyor Rajabovga tegishliligi aytilayotgan audioyozuv tarqaldi. Audioyozuvdan ma’lum bo‘lishicha, voqea tuman hokimi va mahalla raislari ishtirokidagi yig‘ilishda bo‘lib o‘tgan.
Audioyozuvda hokim yig‘ilish ishtirokchilarini pul tushumlarini o‘z vaqtida ta’minlamagani uchun turli so‘zlar bilan haqoratlagani va so‘kkani, shuningdek, ba’zilarni urgani eshitiladi.
Mazkur audioyozuv bo‘yicha viloyat hokimligi munosabat bildirdi.
Audioda turli xil uyatli so‘zlar bilan yig‘ilganlarni “siylagan” tuman hokimi ekanligi aniq, buni inkor etish fikridan yiroqmiz. Bu borada ichki tartibda chora ko‘rish bilan cheklanish ham mumkin edi. Ammo qonuniy ravishda chora ko‘rilishi, “Nega oddiy xalq xato qilsa, jazo yoki jarima, hokim xato qilsa, kechirim?” kabi tabaqalashtiruvchi gap-so‘zlar kelib chiqmasligi tarafdorimiz.Viloyat hokimigi tomonidan qayd etilishicha, tegishli tashkilotlar tomonidan o‘rganishlar yakunlanishi bilan holat bo‘yicha qo‘shimcha ma’lumot beriladi.Qashqadaryo viloyati hokimligi axborot xizmati
Shuningdek, mazkur audioyozuv bo‘yicha O‘zbekiston Bosh prokuraturasi ham bayonot berdi.
Bayonotga ko‘ra, Qashqadaryo viloyati prokuraturasi organlari tomonidan internet nashrlarida va ijtimoiy tarmoqlarda 2-mart, dushanba kuni, Mirishkor tumani hokimi Baxtiyor Rajabovga mansubligi ta’kidlanib tarqatilgan audioyozuvlarning haqqoniyligi, qachon, qayerda va qanday holatlarda yuz berganligi hamda boshqa holatlar o‘rganilmoqda.
O‘rganish natijalari har tomonlama qonun doirasida ko‘rib chiqilib, ular yuzasidan qo‘shimcha bayonot beriladi, deyiladi Bosh prokuratura bayonotida.
Eslatib o‘tamiz, Mirishkor tumani sobiq hokimi Ravshan Komilov dala maydonidan makkajo‘xori olayotgan otaxonni haqoratlagani uchun tanilgan va keyinroq bu ishi uchun uzr so‘ragan. Mazkur voqeadan ko‘p o‘tmay Ravshan Komilov o‘z lavozimidan ozod etilgan va uning o‘rniga amaldagi hokim Baxtiyor Rajabov tayinlangan. Mazkur tayinlovgacha viloyat hokimining qishloq va suv xo‘jaligi masalalari bo‘yicha o‘rinbosari bo‘lib ishlagan Baxtiyor Rajabovga so‘nggi imkoniyat berilgan edi.
Izoh (0)