Xitoydagi vaziyat
Xitoy Sog‘liqni saqlash milliy komissiyasining ma’lum qilishicha, butun mamlakat bo‘ylab virusni yuqtirib olganlar soni 78 mingdan oshib, 32 495 kishi davolanishga muvaffaq bo‘ldi. Koronavirus bilan kasallanish oqibatida vafot etganlar soni 2744 kishiga yetdi.
Koronavirus o‘chog‘i — Xubey provinsiyasida kasallikka chalinganlar 65,5 ming kishini tashkil etmoqda. O‘tgan bir sutka davomida Xubeyda virusni yuqtirib olish bo‘yicha 409 ta yangi holat qayd etilgan, 2288 kishi davolanib, uyiga javob berilgan, yana 26 kishi kasallik oqibatida vafot etgan.
Xitoydan tashqarida koronavirusni yuqtirib olish bo‘yicha 133 ta holat qayd etilgan: Gonkong (2 kishi vafot etgan), Makao va Tayvan — tegishli ravishda 91, 10 va 32 nafar odam. Dunyoning 30 dan ortiq mamlakatida aniqlangan holatlar hisobga olinganda 82 027 kishida koronavirus aniqlangan, 2800 bemor vafot etgan.
O‘zbekistondagi vaziyat
27-fevral, payshanba kuni, Seuldan kelgan HY514 reysi yo‘lovchilari Toshkent aeroporti xalqaro terminalining alohida zalida vaqtincha sanitariya izolyatsiyasiga joylashtirildi. “Sog‘liqni saqlash vazirligi tomonidan bir qator zarur profilaktik tadbirlar o‘tkazilib, SARS belgilari yo‘qligi tasdiqlangandan so‘ng, yo‘lovchilarga karantin xonasidan chiqishlariga ruxsat beriladi”, — deyiladi xabarda.
Sog‘liqni saqlash vazirligi samolyot yo‘lovchilarining izolyatsiyasi bo‘yicha xabar berdi. Ma’lum bo‘lishicha, Janubiy Koreyaning Seul shahridan Toshkentga uchgan samolyot bortida bir yo‘lovchining salomatligi yomonlashganligi sababli samolyot soat 20:55 da Seul aeroportiga qaytarilgan. Shundan so‘ng samolyot Toshkentga 232 nafar yo‘lovchi, 12 nafar ekipaj a’zosi bilan jami 244 nafar fuqaro uchgan va 27-fevral kuni poytaxt aeroportiga kelib qo‘ngan.
Ma’lum bo‘lishicha, Seulda salomatligi yomonlashib, insult alomatlari aniqlangan yo‘lovchi Qirg‘iziston fuqarosi B.T. aeroportda tushirib qoldirilgan. B.T.dan, uning farzandi hamda bir nafar fuqarodan koronavirus infeksiyasiga tahlillar olingan. Sog‘liqni saqlash vazirligiga ko‘ra, olingan tahlil natijalarida qoldirilgan yo‘lovchilarda koronavirus alomatlari aniqlanmagan.
Saudiya Arabistoni Tashqi ishlar vazirligi bayonotiga ko‘ra, mamlakat rasmiylari Makka shahrida Umra amalini bajarish va Madinada Nabaviy masjidini ziyorat qilish uchun keladigan fuqarolarning Saudiya Arabistoniga kirishini vaqtincha to‘xtatishga qaror qilgan. Ushbu chora koronavirusga qarshi kurash doirasida amalga oshirilayotgani, Saudiya hukumatining ushbu masala bo‘yicha rasmiy qarori va bayonoti bugun e’lon qilinishi kutilmoqda.
Vazirlar Mahkamasi huzuridagi Din ishlari bo‘yicha qo‘mita Umra vizasining berilishi vaqtincha to‘xtatilganini ma’lum qildi. Qo‘mita matbuot xizmati xabariga ko‘ra, Saudiya Arabistoni podshohligi Haj va Umra vazirligi 2020-yil 27-fevral kunidan e’tiboran dunyoning barcha mamlakatlari uchun Umra vizasi taqdim etishni vaqtincha to‘xtatgan.
Jahondagi vaziyat
Diamond Princess layneridan Qozon shahriga evakuatsiya qilingan rossiyaliklarning uch nafarida koronavirus kasalligi mavjudligi aniqlandi. Endi Rossiyada pnevmoniyaga chalingan bemorlarning har biri majburiy tartibda koronavirusga tekshiriladi. “Ushbu talab mamlakatning deyarli barcha shaharlariga taalluqli”, — degan “Rospotrebnadzor” rahbari Anna Popova.
Shuningdek, Anna Popova koronavirus infeksiyasi nafaqat havo tomchilari orqali, balki iflos qo‘llar va suv orqali ham yuqishi mumkin, shuning uchun gigiyena qoidalariga qat’iy rioya qilish kerakligini ma’lum qilgan.
Rossiya 1-martdan Janubiy Koreyaga aviaqatnovlarni to‘xtatadi.
Braziliyada birinchi marta koronavirusga chalinish holati tasdiqlandi. Shu tariqa Osiyoda paydo bo‘lgan epidemiya sharoitida Janubiy Amerikada birinchi kasallanish holati qayd etildi. Koronavirus yuqtirgan odam 61 yoshli erkak bo‘lib, u Italiyaning Lobardiya provinsiyasida 12 kun bo‘lganidan keyin San-Pauluga qaytgan.
Milan shahridan kelgan finlyandiyalikda koronavirus bilan kasallanish holati aniqlandi, deb xabar bermoqda Finlyandiya sog‘liqni saqlash va ijtimoiy ta’minot milliy instituti (THL). “Xelsinki viloyatidagi Uusimaa hududida koronavirus infeksiyasi kuzatildi, buni labaratoriya tadqiqotlari ham tasdiqladi. Bemor Italiya shimolida, Milan shahrida, virusni yuqtirib olgan. U ayni vaqtda Xelsinki universiteti kasalxonasida davolanmoqda. Ayolning holati ancha yaxshi”, — deyilgan xabarda.
ICE birjasi ma’lumotlariga ko‘ra, Brent turidagi neftning bir barreli narxi 52,64 dollargacha pasaydi. WTI turidagi neftning narxi esa 48 dollargacha pasaygan. Bu 2019-yil 7-yanvaridan buyon qayd etilgan eng past ko‘rsatkich hisoblanadi. Qayd etilishicha, bunga koronavirusning Xitoy tashqarisidagi mamlakatlarga tarqalishi sabab bo‘lgan.
Izoh (0)