Turkish Airlines aviakompaniyasining Tehrondan Istanbulga reys amalga oshirgan samolyoti bir nechta yo‘lovchilarda koronavirusi borligi gumon qilinganligi sababli Anqaraga jo‘natildi. Bu haqda Turkiya sog‘liqni saqlash vaziriga tayanib, “RBK” xabar berdi.
Nashrning ta’kidlashicha, 17 nafar yo‘lovchida koronavirus borligi gumon qilinmoqda, ularning tana harorati yuqori bo‘lgan. Barcha 132 nafar yo‘lovchi va ekipaj a’zolari ikki hafta davomida karantinda bo‘ladi hamda tibbiy ko‘rikdan o‘tkaziladi.
Daily Sabah gazetasi Turkiya aviatsiyasidagi manbasiga tayanib xabar berishicha, samolyot Turkiya Sog‘liqni saqlash vazirligining iltimosiga binoan Anqara aeroportiga yo‘naltirilgan.
Hurriyet gazetasi Anqara aeroportiga qo‘ngan samolyot tasvirlangan fotosuratlarni e’lon qilgan. Suratlarda layner oldidagi maxsus kiyimli odamlar va tez yordam mashinalarini ko‘rish mumkin.
Reuters tomonidan keyinchalik berilgan xabarga ko‘ra, Turkiya Sog‘liqni saqlash vazirligi samolyotdagi yo‘lovchilardan hech birida koronavirus mavjud emasligini ma’lum qilgan.
Turkiya 23-fevraldan boshlab koronavirus tarqalishidan qo‘rqib Eron bilan aviaqatnovlarni to‘xtatdi. Biroq Turkiya o‘z fuqarolarini Erondan olib chiqish uchun maxsus reyslar tashkil qilgan.
Eron hududida koronavirus aniqlangani 19-fevral kuni ma’lum bo‘ldi. Shu kuni Eron ommaviy axborot vositalarida ushbu kasallik tashxisi qo‘yilgan ikki kishining vafoti haqida xabar bergan.
So‘nggi ma’lumotlarga ko‘ra, Eron sog‘liqni saqlash va tibbiy ta’lim vaziri o‘rinbosari Iroj Xarirchida koronavirus aniqlangan. Hasan Ruhoniy Eronda koronavirus vahimasi bilan bog‘liq vaziyatga izoh berdi.
Armaniston bosh vaziri Nikol Pashinyan Facebook’dagi sahifasida Eronda koronavirus infeksiyasi tarqalgani sabab Armaniston Eron bilan chegarani yopib, aviaqatnovlarni ikki haftaga to‘xtatganini ma’lum qilgan. Turkiya hukumati ham xuddi shunday choralar ko‘rishini ma’lum qilgan. Afg‘oniston va Gruziya Eron bilan aviaqatnovlarni to‘xtatgan, Pokiston esa Eron bilan chegarani vaqtincha yopgan.
Bundan tashqari, Bahrayn koronavirus tufayli Dubay va Sharjadan aviareyslarni qabul qilishni to‘xtatdi. Janubiy Koreyada koronavirus bilan kasallanganlar soni 977 nafarga yetdi. Avstriyada koronavirus yuqtirib olgan dastlabki ikki kishi aniqlandi. Fransiyada koronavirusga chalingan bemorlar davolanishga muvaffaq bo‘ldi. Yaponiyada davlat idoralariga xodimlarini uy sharoitida ishlashga o‘tkazish buyurildi. AQSh aprel oxirigacha koronavirusga qarshi vaksinani sinovdan o‘tkazishi mumkinligi ma’lum qilindi. Ispaniyaning Tenerife orolida koronavirus yuqtirib olgan mehmon sababli ichida ming kishi bo‘lgan mehmonxona izolyatsiya qilindi.
Izoh (0)