Qozog‘istonning Turkiston viloyatida militsiya xodimlari va Milliy xavfsizlik qo‘mitasi Qozog‘iston—O‘zbekiston chegarasidagi “Qoplonbek” nazorat-o‘tkazish punktida tovlamachilik bilan shug‘ullangan “Sariag‘ashliklar” uyushgan jinoyatchilik guruhini qo‘lga oldi. Bu haqda Qozog‘iston Ichki ishlar vazirligining “Politsia.kz” axborot portali xabar berdi.

Ma’lum bo‘lshicha, jinoyatchilar uzoq vaqt davomida yuk mashinalari haydovchilaridan O‘zbekistonga o‘tish uchun 15 mingdan 50 ming tengegacha (40-134 dollar) pul undirib kelgan.

Haydovchilar aytilgan pulni to‘lashdan bosh tortgan taqdirda tovlamachilar ularni kaltaklab, mashinalari shinalarini teshib, old oynalarini sindirgan.

Kuchishlatar tuzilma xodimlari jami 13 kishini qo‘lga olgan. Ularning barchasi Turkiston viloyatida yashovchilardir. Ashyoviy dalil sifatida ulardan miltiq, pichoq va pullar olib qo‘yilgan.

Qo‘lga olinganlarga nisbatan Qozog‘iston Jinoyat kodeksining 194-moddasi (Tovlamachilik) bo‘yicha jinoiy ish ochilgan bo‘lib, ushbu moddada mulkni musodara qilish bilan bir qatorda 7 yildan 15 yilgacha ozodlikdan mahrum qilish jazosi belgilangan.