Xitoyning eng yuqori qonun chiqaruvchi organi — Butunxitoy xalq vakillari kengashi (BXXVK)ning doimiy qo‘mitasi dushanba kuni har ikki oyda bir marta o‘tkaziladigan navbatdagi sessiyaning ochilishida koronavirus epidemiyasi sababli yillik sessiyani keyinga qoldirish haqida qaror qabul qildi. Bu haqda “RIA Novosti” xabar bermoqda.

Foto: Reuters

BXXVKning yillik sessiyasi — Xitoyning asosiy siyosiy hodisasi bo‘lib, avvalgi yillarda bo‘lgani kabi 5-mart kuni ochilishi kerak edi. Taxminan 10 kun davom etadigan ushbu sessiyada deputatlar mamlakatni ijtimoiy-iqtisodiy rivojlantirish rejasini, budjet loyihasini, harbiy budjetni, shuningdek, boshqa qonun hujjatlarini ko‘rib chiqadi.

Avvalroq BXXVK doimiy qo‘mitasining vakili Chjan Tyanvey navbatdagi doimiy sessiyada har yilgi parlament sessiyasini keyinga surish to‘g‘risida qaror qabul qilinishini aytgan.

BXXVKning qariyb 3 mingga yaqin delegatlari, shu jumladan, provinsiya va munitsipal darajadagi yuqori martabali rasmiy shaxslari ayni paytda o‘z hududlarida koronovirus epidamiyasiga qarshi kurash bilan band.

Xitoy Konstitutsiyasi va tegishli qonunlariga ko‘ra, yillik sessiyani kechiktirish to‘g‘risida qaror Butunxitoy xalq vakillari kengashining doimiy qo‘mitasi tomonidan qabul qilinadi.

Xitoy Milliy sog‘liqni saqlash komissiyasi ma’lumotlariga ko‘ra, Xitoyda koronavirus infeksiyasidan vafot etganlar soni bir sutkada 150 kishiga ko‘payib, qurbonlarning umumiy soni 2592 kishiga yetdi.  Kasallikdan davolanib, shifoxonani tark etganlar soni esa 24 734 kishiga yetgan. Shuningdek, koronavirus bilan qayta kasallanish holati kuzatildi. Bundan tashqari, xitoylik olimlar koronavirus kasallik alomatlari paydo bo‘lishidan ikki kun avval yuqishi mumkinligini ham aniqladi.

Mamlakatning olti provinsiyasida koronavirus sabab joriy etilgan favqulodda vaziyatga tezkor munosabat bildirishning eng yuqori darajasi pasaytirilgan. Ular orasida kattaligi bo‘yicha Xitoyda ikkinchi o‘rinda turadigan Guandun ham bor.

Avvalroq Jahon sog‘liqni saqlash tashkiloti Xitoy koronavirusiga qarshi ilk vaksina bir yarim yildan so‘ng paydo bo‘lishi mumkinligini ma’lum qilgan edi. Fevral oyi o‘rtalarida esa Xitoyda virusga qarshi kurashda samarali bo‘lishi mumkin bo‘lgan dori vositasi ishlab chiqarila boshlangani aytilgan edi.