“Liverpul”ning ayni damdagi tarkibi, balki klub tarixidagi eng kuchlisi bo‘lishi mumkin. Yurgen Klopp jamoasi deyarli 30 yildan beri (so‘nggi bor 1989/90-yilgi mavsum) orziqib kutilayotgan Angliya chempionligiga yaqin turibdi. O‘tgan mavsum esa Yevropa Chempionlar Ligasi g‘olibligini qo‘lga kiritishga ulgurdi.
Hatto yaqinda navbatdagi 10 yillikning bosh yulduzi bo‘lishga asosiy da’vogar sifatida qaralayotgan Kilian Mbappe ham Mersisayd klubiga bo‘lgan munosabatini “g‘alaba mashinasi” jumlalari bilan e’tirof etdi. Hozirgi “Liverpul” o‘zining katta maqsadlari, xohishlariga ega. Klubda eng yaxshi va yulduz futbolchilarni o‘z safiga qo‘shib olish imkoniyati bordek ko‘rinmoqda. Biroq klubda bunday holat har doim kuzatilgan emas. Jumladan, doimiy mablag‘ tanqisligi, raqobatchi klublarning yosh futbolchilarga beradigan katta takliflari — “Liverpul”ning yuqori darajali futbolchilar bilan shartnoma imzolashiga to‘sqinlik qilib kelgan. “Qizillar” hatto hammasi hal bo‘layotgan vaqtda ham ayrim futbolchilar bilan shartnoma imzolay olmagan. Masalan, futbolchi tibbiy ko‘rikdan muvaffaqiyatli o‘tgan, biroq klub uni rad qilishga majbur bo‘lgan holatlar bo‘lgan. Shu kabi sabablarga ko‘ra, “Liverpul” bir necha bo‘lajak yulduz futbolchilardan quruq qolgan.
Endi esa “Liverpul” quyida nomi keltiriladigan futbolchilar bilan shartnoma imzolaganida nima bo‘lishini bir tasavvur qilib ko‘ring-a!Garet Beyl
2005/06-yilgi mavsumda “Liverpul” skautlari “Bolton Uonderers” hamda “Sauthempton” klublarining yosh jamoalari o‘rtasidagi bahsni kuzatish uchun stadionga boradi. Skautlar uchrashuvga Garet Beylning “Sauthempton”dagi jamoadoshi Devid Makgoldrikning o‘yinini kuzatish niyatida edi. Biroq o‘yin vaqtida ularning e’tiborini chap qanotda to‘p surgan uelslik yigit tortdi.
“O‘sha kuni chap qanot himoyachisi shunchaki qoyilmaqom harakat qildi”, — deydi “Liverpul”ning o‘sha vaqtdagi delegatsiyasi a’zolaridan biri. “Ortga qaytib, klub rahbariyatiga shunday dedik: Makgoldrik biz uchun emas, ammo biz Garet ismli yigitcha bilan shartnoma imzolashimiz shart”.O‘sha vaqtda “Liverpul”ning Darren Potter ism-sharifli yarim himoyachisi “Sauthempton” safida ijara asosida to‘p surardi. Mersisayd klubi esa Potterni Beylga ortiqcha to‘lovlarsiz almashtirishni taklif qildi. “Avliyolar” rahbariyati bo‘lsa Potterga qo‘shib, biroz mablag‘ to‘lashni ham talab qildi. Agar pul qo‘shilganda, Garet transferi amalga oshishi mumkin edi.“O‘sha vaqtda hech kim Beyl haqida gapirmasdi. Sauthemptonda ham uning kuchiga hali hech kim ishonmas, Garet esa endigina u yerda stipendiyaga ega bo‘lgandi, xolos”, — deya yodga oladi skautlardan biri.
Beylning hali yosh ekanligi va klubning qo‘ygan talabi “Liverpul” rahbariyati kulgisiga sabab bo‘ldi. Ularning fikricha, Beyl hali “bolakay”, Potter bo‘lsa, allaqachon professionalga aylangan futbolchi edi.
Kelasi mavsumning o‘zidayoq Garet 10 million funt evaziga “Tottenhem” futbolchisiga aylandi. Keyin esa “Real”ga o‘tib, dunyoning eng qimmat futbolchisi sifatida e’tirof etildi. Madrid bilan Chempionlar Ligasida 4 marta g‘olib chiqdi. Hatto “qizillar” darvozasiga final bellashuvida qoyilmaqom gol ham urdi. O‘z vaqtida professional sifatida e’tirof etilgan Potter “Liverpul” safida atigi 17 ta o‘yin o‘tkazib, so‘ngra Angliyaning quyi divizion klublariga yo‘l oldi-qoldi.Krishtianu Ronaldu
“Liverpul” — Angliyaning eng yaxshi klublaridan biri. O‘z tarix va an’analariga ega shunday klub safida to‘p surish esa har bir futbolchi uchun orzu. Ular men va “Sporting”ga mos keladigan taklif bilan chiqishiga umid qilaman”, — degan edi Krishtianu Ronaldu 2003-yil jurnalistlarga bergan intervyusida.2003-yil portugaliyalik futbolchini deyarli Yevropaning barcha klublari kuzatib bordi. Uning nomi juda ko‘p jamoalar bilan birga tilga olindi. “Liverpul” ustozi Jerar Ulye hamda uning yordamchisi Fil Tompson Krishtianuning qanday o‘yin ko‘rsatayotganini ko‘rish uchun Lissabonga ham bordi.
“Uning nomini deyarli barcha klublar bilan birga tilga olingandi”, — deya esga oladi Fil Tompson.
Futbol agenti Pol Stretfordga ishlagan “Manchester Siti”ning sobiq futbolchisi Toni Genri Ronalduning agenti Jorje Mendeshdan mijoziga bo‘lgan qiziqishni oshirish bo‘yicha topshiriq olgandi.“Liverpul”da esa o‘sha vaqtda ikki nafar iqtidorli yosh hujumchi hujumchi bor edi. Sinama-Pongol va Entoni le Tallek. Ulyeda esa Ronaldu sabab klubning maoshlar bo‘yicha strukturasiga zarar yetishi mumkinligi, uning esa kiyim almashtirish xonasiga ta’siri borasida xavotirlari ham bor edi. Shu tariqa Ronaldu “Manchester Yunayted”ga o‘tdi-ketdi.“Ular Ronalduni sotishga qattiq kirishgandi. Shu boisdan meni uning o‘yinini ko‘rishga taklif qilishdi. Ular shartnomadan olinadigan komissiya to‘lovi 4 million funtni tashkil qilishi, faqat bu summa 4 yillik shartnoma davrida yiliga 1 million funtdan to‘lanishi haqida aytishdi.
Men esa Ronaldu qancha maosh olishni xohlayotganini so‘radim. Ular Krishning soliqlardan tashqari yillik 1 million funt maoshga rozi ekanligini ma’lum qildi. Bu 18 yoshli yigitcha uchun haddan ortiq ko‘p edi. Ammo bu summa borasida savdolashish mumkin edi.
O‘sha kuni yakshanba edi. Ularga Liverpulga qaytishim kerakligi va Jerar Ulye bilan gaplashib nimalar qila olishimiz mumkinligini o‘ylab ko‘rishimiz lozimligini aytdim. Hamma ma’lumotlarni Ulyega berdim. U esa klub bosh direktori Rik Parri bilan gaplashishini aytdi.
Navbatdagi hafta Melvuddaligim vaqti Sky Sports xabar qilyapti: “Manchester Yunayted” 12,2 million funt evaziga Krishtianu Ronalduni “Sporting”dan sotib olyapti”. Ko‘zlarimga ishonmasdim. Qanday qilib, bir necha kun ichida uning uchun to‘lov 4 milliondan 12,2 million funtga oshib ketdi? Ulye esa menga qo‘ng‘iroq qilib, Toni Genridan vaziyatni tushuntirib berishini so‘rashimni aytdi. Toni bo‘lsa, hamma gap Jorje Mendeshda bo‘lganligini ma’lum qildi.
To‘lovning 3 baravar oshib ketgani hayratlanarli edi. U katta iqtidor egasi edi, biroq hech kim uning oldindan qanchalik buyuk futbolchi bo‘lishini oldindan ayta olmasdi.
Fil Tompson, murabbiy
Dani Alves
Transfer yakuniga yetib qolgandi. 2006-yil yozida “Sevilya” braziliyalik o‘ng qanot himoyachisi Dani Alvesni 8 million funt evaziga “Liverpul”ga sotishga rozilik bildirgandi. Ammo transfer yakunidan oldin Rafa Benites muammoga duch keldi. Klub rahbariyati Benitesga ikkita yo‘lni taklif qildi. Ispaniyalik mutaxassis “Sevilya”dan Alvesni yoki hujumchi sotib olishni tanlashi kerak edi. Klub ham himoyachi, ham hujumchi sotib ololmasligini Benitesga ma’lum qildi.
Hujum chizig‘ini kuchaytirishga ehtiyoj sezib turgan Benites “Feyenoord”dan 9 million funt evaziga Dirk Kyoytni sotib olish variantida to‘xtashga majbur bo‘ldi. Shu tariqa Alvesni “Enfild”ga olib kelish rejasi barbod bo‘ldi.
Alves esa “Sevilya”da yana 2 yil qolib, shundan so‘ng 30 million funt evaziga “Barselona”ga o‘tdi. Dani Kataloniya klubi bilan La Ligada 6 marta, Chempionlar Ligasida esa 3 marta g‘olib chiqdi.
“Benites davrida bunday holatlar juda ko‘p bo‘lgan. Yo klubda transferni dedlaynga qadar yakunlash uchun pul bo‘lmagan, yo klub transfer borasida bir qarorga kela olmagan. Bu haqida gap ketganda xayolga Simao va Floran Maluda ham keladi. Ularni qo‘lga kiritishimiz mumkin edi. Hatto Nemanya Vidich ham asosiy transfer maqsadimiz bo‘lgan, biroq keyin “Manchester Yunayted” ko‘proq pul taklif qilib, uni ham ilib ketgandi”, — deya yodga oladi “Liverpul”ning Benites davridagi transfer ishlariga yaqin kishilardan biri.
- Muallif: Jeyms Pirs
- Tarjimon: Asror Abdunazarov
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)