Osiyo taraqqiyot banki O‘zbekistonda jamoat transporti va shaxsiy transport vositalari sohasida elektr transport vositalarini bosqichma-bosqich joriy etish bo‘yicha tavsiyalar beradi va texnik yordam ko‘rsatadi. Bu haqda 21-fevral kuni Energetika vazirligida bank maslahat kengashi vakillari bilan bo‘lib o‘tgan uchrashuvda ma’lum qilindi.
Osiyo taraqqiyot banki missiyasining maqsadi O‘zbekistonda elektr transportini rivojlantirish siyosati va strategiyasini ishlab chiqish bo‘yicha maslahat berish, elektr transport vositalarining atrof-muhitga ta’sirini tahlil qilish hamda soliq, tariflash, subsidiya ajratish kabi sohalarda jahon amaliyotini hisobga olgan holda iqtisodiy oqibatlarni baholashdir.
Uchrashuv davomida texnik yordamning asosiy yo‘nalishlari, jamoat hamda shaxsiy transport vositalari sohasiga elektr transport vositalarini bosqichma-bosqich joriy etish, bu borada tegishli standartlarni amalga oshirish hamda zarur infratuzilmani rivojlantirish kabi masalalar muhokama etilgan.
Shuningdek, O‘zbekistonda quyosh manbalarining katta imkoniyatlarini hisobga olgan holda yoqilg‘i quyish stansiyalarining turlarini aniqlash, resurslarni tejash zaruriyati va batareyalar ishlab chiqarish bo‘yicha tavsiyalar berishning asosiy yo‘nalishlari belgilab olingan.
Eslatib o‘tamiz, O‘zbekiston Prezidentining “O‘zbekiston Respublikasida turistik xizmatlarni yanada diversifikatsiya qilish chora-tadbirlari to‘g‘risida”gi qarori loyihasida elektromobillar uchun quvvatlash stansiyalarini qurish majburiyati shaharsozlik normalari qatoriga kiritish taklif qilingan.
Avvalroq Tashkent City hududida PPX xodimlari elektromobilda harakatlanishni boshlagan edi. Andijon IIB esa “Xan” elektromobilini sinovdan o‘tkazgan edi. “O‘zavtosanoat” elektromobillar uchun infratuzilma yaratish ustida ishlayotganini ma’lum qilgan.
Izoh (0)