Mudofaa vazirligi Janubi-g‘arbiy maxsus harbiy okrugga qarashli “Nuriston” poligonida Nuriston garnizonidagi harbiy xizmatchilar ishtirokida amaliy mashg‘ulotlar o‘tkazildi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.

Foto: Mudofaa vazirligi axborot va ommaviy kommunikatsiyalar departamenti

Rejaga muvofiq, jangovar guruh tezkor harakatlanib, belgilangan nuqtaga yetib kelishi bilan birinchi sinovni qarshi oldi. Shartli dushman o‘rnashib olgan hududga eltuvchi yo‘lda ommaviy qirg‘in qurollari qo‘llanilgani bois shaxsiy tarkib snayperlar guruhining kuzatuvi va himoyasi ostida zudlik bilan shaxsiy himoya vositalarini kiydi. Bu zaharlangan hududdan shartli dushman o‘rnashib olgan nuqtaga qadar yetib borish va uni tor-mor keltirish yo‘lidagi muhim qadam bo‘ldi.

Foto: Mudofaa vazirligi axborot va ommaviy kommunikatsiyalar departamenti

Shundan so‘ng, harbiy xizmatchilar jangovar ikkilik taktik guruhlariga bo‘lingan holda harakatni davom ettirdi. Ularni shartli dushman bilan yuzma-yuz bo‘lishi oldidan ikkinchi sinov to‘sig‘i – chaqqonlik va epchillikni talab etadigan simli yo‘lak kutib turardi. Taktik guruhlar o‘zaro ichki navbatchi kuzatuvi asosida bu to‘siqdan ham muvaffaqiyatli o‘tib oldi. Harbiy xizmatchilar shu tariqa taktik tayyorgarlikning bir nechta me’yorlarini ham a’lo darajada bajardi. Shartli dushman yakson etildi.

Foto: Mudofaa vazirligi axborot va ommaviy kommunikatsiyalar departamenti

Foto: Mudofaa vazirligi axborot va ommaviy kommunikatsiyalar departamenti

Foto: Mudofaa vazirligi axborot va ommaviy kommunikatsiyalar departamenti

Kunning ikkinchi yarmida shaxsiy tarkib “Merganlar marrasi” yo‘lagi bo‘ylab harakat qildi. Ular o‘q otish nuqtasiga yetib kelguncha ushbu yo‘lakning bir-biridan murakkab, turli-tuman to‘siqlarini yengib o‘tdi.

Foto: Mudofaa vazirligi axborot va ommaviy kommunikatsiyalar departamenti

Foto: Mudofaa vazirligi axborot va ommaviy kommunikatsiyalar departamenti

Shu tariqa amaliy mashg‘ulotlarda harbiy xizmatchilarning jangovar mahorati, sabr-toqati va chidamliligi yana bir bor sinovdan o‘tdi.