“Namaste Tramp”. AQSh prezidentining Hindistonga tashrifiga qanday tayyorgarlik ko‘rildi? (fotogalereya)
AQSh prezidenti Donald Tramp 24-fevral, dushanba kuni Hindistonga tashrif buyurdi. Tashrif davomida unga mamlakatning birinchi xonimi Melaniya Tramp va 12 kishidan iborat rasmiy delegatsiya hamrohlik qiladi. Ular orasida Oq uy maslahatchilari hisoblangan Trampning qizi Ivanka va kuyovi Jared Kushner ham bor.
Bu AQSh prezidentlari uchun oxirgi besh yildagi Hindistonga birinchi tashrif bo‘ladi. 24-fevral kuni Tramp Ahmadobod shahriga tashrif buyuradi va Hindiston bosh vaziri Narendra Modi bilan birga respublikadagi eng katta kriket arenasida nutq qiladi. Stadionga borish yo‘lida ularni 7 million odam qarshi olishi aytilmoqda. AQSh prezidentining korteji yo‘li bo‘ylab folklor jamoalari chiqish qiladi.
Shu kuni Tramp rafiqasi bilan Toj Mahal yodgorligi joylashgan Agra shahriga tashrif buyuradi. 25-fevral kuni Nyu-Delida ikki tomonlama muzokaralar o‘tkaziladi, shuningdek Hindiston prezidenti Ram Natx Kovind bilan uchrashuv belgilangan. Kechqurun prezident saroyida kechki ovqat rejalashtirilgan.
