AQSh hukumati 24-fevral, dushanba kuni, xorijliklarga Green Card lotereyasi orqali mamlakatda yashash huquqini berishning yangi tartib-qoidalarini tasdiqlaydi. Unga ko‘ra, davlatdan ijtimoiy yordam evaziga yashashni istaganlar uchun qoidalar qiyinlashtiriladi. Bu haqda Oq uy matbuot xizmati ma’lum qilgan, deb yozmoqda “RBK”.

Amerika administratsiyasi Oliy sudning so‘nggi sud taqiqlarini olib tashlash bo‘yicha qarorini qanoatlantirgan va bu orqali kimning ijtimoiy yordam puliga muhtojligini hal etib oladi (public charge regulation). The Hill nashrining yozishicha, tanqidchilar ushbu qoidani muhojirlar uchun “boylik testi” deb atamoqda.

Oq uy xabarida aytilishicha, ushbu chora amerikalik soliq to‘lovchilarni himoya qilish, haqiqatan ham ijtimoiy ta’minotga muhtoj amerikaliklar uchun dasturni qo‘llab-quvvatlash va federal budjetdagi defitsitni qisqartirish maqsadida qo‘llanilmoqda. Yangi qoida asosiy huquqiy prinsiplardan bo‘lgan AQSh jamiyatiga kelgan yangi amerikaliklarning moliyaviy jihatdan mustaqil bo‘lishi va soliq to‘lovchilarga qaram bo‘lmasligini ta’minlaydi.

Ushbu tashabbusni 2019-yil avgust oyida AQSh prezidenti yordamchisi Stiven Miller ilgari surgandi. Taklifga ko‘ra, hukumat xorijliklarning daromadi borasidagi ma’lumotlar va ularning ijtimoiy yordamlardan qay darajada foydalanishiga qarab, ularga Green Card beradi yoki bermaydi. Ularga ijtimoiy ta’minot, jumladan, ovqatlanish talonlari, davlat tomonidan berilgan uy-joylar yoki Medicaid dasturi bo‘yicha tibbiy sug‘urta kiradi. Ushbu chora 1882-yilda qabul qilingan Immigratsiya haqidagi qonundan kelib chiqib qo‘llanilmoqda, hujjatda hukumat davlat tomonidan boqiladigan har qanday shaxsga viza bermaslik huquqiga ega ekani haqida yozilgan.

Qoidalar 2019-yil oktabr oyida kuchga kirishi lozim edi, biroq Nyu-York federal sudyasi ushbu farmoyishni tasdiqlamadi. 27-yanvarda Oliy sud Green Card berish bo‘yicha qoidalarni qat’iylashtirishga rozilik berdi. 21-fevralda oliy instansiya ushbu qoidalarni Illinoys shtatida joriy etish yuzasidan ishni rad etdi. The Washington Post’ning yozishicha, shtat immigrantlar soni bo‘yicha Kaliforniya, Texas, Nyu-York, Florida va Nyu-Jersidan keyin 6-o‘rinda turadi (1,8 million muhojir).

Yanvar oxirida AQSh hukumati viza olish bo‘yicha qoidalar o‘zgarishini ma’lum qilgan. Ular Qo‘shma Shtatlarga farzandi Amerika fuqaroligini olishi uchun mamlakatga homilador holda keluvchi ayollarning ushbu harakatiga qarshi kurashishga qaratiladi. AQShga kelayotgan muhojirlar oqimini kamaytirish mamlakatning amaldagi prezidenti Donald Tramp siyosiy dasturining asosiy yo‘nalishlaridan biri edi.