“Tabiiy portlashlar, okopdagi jang, Belarus aktyorlari”. “Ilhaq” filmining jang sahnalari Belarusda suratga olinmoqda (foto)
Rejissor Jahongir Ahmedovning “Ilhaq” tarixiy-badiiy filmining ikkinchi jahon urushi bilan bog‘liq murakkab jang sahnalari Belarusda suratga olinmoqda.
Bu haqda film rejissori Jahongir Ahmedov jurnalist Feruz Muhammadga bergan qisqa intervyusida ma’lum qildi.
‘Ilhaq” filmining Belarusdagi murakkab jang sahnalarini 18-fevraldan suratga olishni boshladik. Bu yerda umimiy to‘rtta katta epizodni suratga olishni rejalashtirganmiz. Ushbu to‘rt epizod to‘rtta joyda Leningrad yaqinida, Ukrainada, Belarus hamda Varshava yaqinida bo‘lib o‘tgan.Ushbu to‘rtta epizodni suratga olish uchun to‘rt oy davomida, ya’ni 2019-yilning noyabr oyidan buyon tayyorgarlik ko‘rgan edik.
Filmda yigirmaga yaqin Belarus kino aktyorlari suratga tushadi. Ular orasida Gennadiy Churikov, Dmitriy Mashko, Viktor Bogushevich, Lolita Taborko, Alla Poplavskaya kabi taniqli aktyor va aktrisalar bor.
Jahongir Ahmedov, “Ilhaq” filmining rejissori
Ma’lumot uchun, film “O‘zbekkino” milliy agentligi buyurtmasiga binoan “Ezgu film” kinostudiyasi tomonidan suratga olinmoqda.
“Ilhaq” tarixiy filmining ssenariy mualliflari Jahongir Ahmedov hamda Hasan Toshxo‘jayevlar tomonidan yozilgan. Film operator Jahongir Ibragimov, rassom Bahriddin Shamsuddinov, libos Zuhra G‘aniyeva, grimm Zilola Sobirova, prodyuser Zafar Yo‘ldoshevlar tomonidan suratga olinmoqda.
