Poltava viloyatining Noviye Sanjari qishlog‘ida mahalliy aholi vakillari Xitoydan koronavirus sabab evakuatsiya qilingan ukrainaliklarni sanatoriyada tashkil etilgan karantin hududiga kiritmadi. Qishloq odamlari yo‘lni yopib, XXRdan kelgan vatandoshlari o‘tirgan avtobuslarni toshbo‘ron qilgan. Noroziliklar oqibatida olomon hamda politsiya o‘rtasida to‘qnashuvlar kuzatilgan va 24 nafar odam hibsga olingan.
20-fevral, kunduz kuni bortida 45 nafar ukrainalik va 27 nafar boshqa davlatlar fuqarosi bo‘lgan Xitoydan uchgan samolyot Xarkovga qo‘ngan. Ularni Poltava viloyatidagi Noviye Sanjari qishlog‘i milliy gvardiya sanatoriysiga karantinga joylashtirilish rejalashtirilgandi.
Noviye Sanjari aholisi sanatoriyga Xitoydan evakuatsiya qilinganlarning joylashtirilishiga qarshi chiqdi.
Norozilik o‘tkazayotgan mahalliy aholi yo‘llarni yopdi, to‘siqlar qo‘ydi va evakuatsiya qilingan ukrainaliklar bo‘lgan avtobuslarni toshbo‘ron qildi.
Tunga borib noroziliklarda politsiya va olomon o‘rtasidagi to‘qnashuvlar kuzatildi.
Politsiya 24 nafar odamni hibsga oldi. To‘qnashuvlarda o‘n nafar odam, jumladan 9 nafar politsiyachi turli darajadagi jarohatlar olgan.
Ommaviy tartibsizliklar va huquqni muhofaza qiluvchi organlar xodimlariga tahdid hamda zo‘ravonlik holati yuzasidan ikkita jinoiy ish qo‘zg‘atilgan.
Noroziliklarga qaramay evakuatsiya qilingan ukrainliklarning yettita avtobusi sanatoriy hududiga kirishga muvaffaq bo‘lgan.
Favqulodda holatlar bo‘yicha Ukraina davlat xizmati evakuatsiya qilinganlarning hech birida koronavirus bilan kasallanish alomatlari kuzatilmaganini ma’lum qilgan.
Sanatoriy ikki hafta ichida to‘liq muhofaza qilingan obyektga aylantiriladi.
Ukraina sog‘liqni saqlash vaziri Zoryana Skaletskaya ikki hafta davomida evakuatsiya qilingan fuqarolar bilan birga karantin hududida bo‘ladi.
“Keyingi 14 kunni ular bilan bir binoda, bir xil sharoitda birga o‘tkazaman. Mening u yerga borishim qishloq aholisi va mamlakatdagi boshqa odamlarning xavotirini kamaytiradi degan umiddaman”, — deya ta’kidlagan SSV rahbari.
Izoh (0)