O‘zbekiston Soliq kodeksining yangilangan tahririda “Google solig‘i” belgilab qo‘yilgani haqida xabar berilgandi. “Yandeks”ning O‘zbekistondagi mintaqaviy direktori lavozimida bir necha yillar ishlagan Yevgeniy Lukyanchikov “Google solig‘i” — ikki tomonlama soliqqa tortilishga olib kelishi mumkinligini ma’lum qilgan. Davlat soliq qo‘mitasi esa ikki tomonlama soliqqa tortish bo‘yicha gap bo‘lishi mumkinmasligni bildirdi.
Ta’kidlanishicha, 2020-yilda O‘zbekiston chet el kompaniyalari tomonidan taqdim etiladigan elektron xizmatlarga qo‘shilgan qiymat solig‘ini joriy etish orqali raqamli bozorni zamonaviy moliyaviy boshqaruv tizimiga o‘tgan.
Soliq kodeksining yangi tahririda o‘z mamlakatida bo‘la turib internet tarmog‘i orqali O‘zbekistondagi jismoniy shaxslarga xizmat ko‘rsatadigan xorijiy yuridik shaxslar uchun 15 foiz miqdorida QQS belgilangan.
Bu kabi elektron xizmlatlarga quyidagilar kirishi mumkin: dasturiy ta’minotdan foydalanish huquqini taqdim etish (xususan, onlayn-o‘yinlar), elektron kitoblardan va boshqa kontentlardan foydalanish huquqi, onlayn-reklama va hokazo.
“Ommaviy axborot vositalarida bu ‘Google solig‘i’ deyilmoqda — bu xalq orasida tarqalgan norasmiy nom. Bu yangi soliq turi emas, balki barchaga tanish bo‘lgan QQS doirasining kengayishidir”, — deyiladi qo‘mita xabarida.
Iste’molchi QQSni bilvosita soliq sifatida to‘laydi, xorijiy kompaniyalar esa QQS xizmatlarining narxini 15 foizi miqdorida belgilagan holda iste’molchilardan soliq summasini oladi va uni O‘zbekiston budjetiga yo‘naltiradi.
“Mazkur yangilik ushbu kompaniyalarning daromad soliqlariga hech qanday ta’sir ko‘rsatmaydi. Xorijiy kompaniyalar O‘zbekistonda daromad solig‘ini to‘lovchilar hisoblanmaydi. Shu sabab xalqaro bitimlar bo‘yicha ikki tomonlama soliqqa tortilish haqida gap bo‘lishi mumkin emas”, — deyiladi xabarda.
Xorijiy kompaniyalarning O‘zbekiston soliq organlari bilan aloqasini soddalashtirish maqsadida maxsus servis — “QQS internet-kompanilari ofisi” tashkil etilgan. Uning yordamida xorijlik soliq to‘lovchilar onlayn ravishda quyidagilarni amalga oshira oladi:
- Soliq xizmatining maxsus elektron akkaunti orqali ro‘yxatdan o‘tishi;
- Soliq hisobotlari va boshqa hujjatlarni to‘ldirishi va yuborishi;
- Har chorak mustaqil ravishda QQS to‘lashi;
- To‘langan soliq va mavjud qarzdorlikni ko‘rishi;
- Soliq organlari bilan aloqda bo‘lishi.
Izoh (0)