Svetlana Ortiqova halollik vaksinasi nafaqat prokurorlarga, balki barcha davlat xizmatchilariga kerakligini bildirdi. Bu haqda bosh prokuror o‘rinbosari 20-fevral kuni Xalqaro press-klubning ijtimoiy sohaga bag‘ishlangan navbatdagi sessiyasida aytib o‘tdi.
“Shaxsan ayta olaman, prokurorlarning 90 foizining muomalasi yaxshi. Ishingiz tushib borganingizdan ketguningizgacha qo‘li ko‘ksida xizmatingizda turadi. To‘g‘ri, 10 foiz prokurorlar borki, butun soha imijiga salbiy ta’sir qilmoqda.
Halollik vaksinasi nafaqat prokurorlarga, balki barcha davlat xizmatchilariga kerak. Chunki korrupsiya holati davlat budjeti bilan munosabatga kirishish jarayonida vujudga keladi,”, — deydi Svetlana Ortiqova.
Uning ta’kidlashicha, eski tartibga ko‘ra prokurorlar fuqarolardan shikoyat arizasi bo‘lmasa ham jinoyat ishini o‘rganishda ishtirok etadi. Biroq davlat rahbari murojaatda prokurorlar va advokatlar endi faqat fuqarodan shikoyat arizasi bo‘lsagina jarayonga aralashishi mumkin bo‘lishi haqidagi qonuniy hujjatni ishlab chiqish masalasini taklif qildi.
“Murojaatnomada prokuraturaga muhim vazifalar qo‘yildi. Bular: sohani isloh etish, soha xodimlari dunyoqarashini o‘zgartirish va albatta, korrupsiya balosining yo‘qotishdir. Sud-huquq sohasida faoliyat yuritayotgan insonlar vijdonan va halol ishlamasa, tizimning o‘zi bunday insonlarni sohadan chiqarib tashlaydi. Huquq sohasida ishlaydigan xodimlarni uyg‘onishga va qonunlarni yaxshi o‘rganishga chaqirib qolamiz”, — dedi u.
Izoh (0)