“Mening fikrim” jamoaviy murojaatlar portaliga hokimlarning televideniye va radiokanallar orqali xalqqa har chorakda hisobot taqdim etish tartibini joriy etish haqida petitsiya joylashtirildi.

Petitsiya matnida ta’kidlanishicha, viloyat va tuman (shahar) hokimlari tele va radiokanallar orqali aholiga har chorakda hisobot taqdim etib borsa, bu orqali jamoatchilik nazorati kuchaytiriladi, eng kamida efir vaqtida murojaat qilgan fuqarolarning murojaatlari ijobiy hal etiladi.

Qayd etilishicha, mazkur hisobotlar orqali xalq bilan samarali muloqot tashkil etiladi, ularga islohotlar mazmuni to‘g‘ridan to‘g‘ri rahbarlar orqali yetkaziladi, rahbar xodimlar, hokimlarning mas’uliyati ortadi.

Shu sababli, petitsiya muallifi viloyat va tuman (shahar) hokimlarining tele va radiokanallar orqali xalqqa har chorakda to‘g‘ridan to‘g‘ri hisobot taqdim etib borish amaliyotini joriy etishni taklif qilgan.

Avvalroq, Senatda hokimlarning vakolatlarini qayta ko‘rib chiqish masalalari muhokama qilingan edi.