Farg‘ona viloyati ichki ishlar boshqarmasi tomonidan 19-fevral kuni tashkil etilgan matbuot anjumanida Qo‘qon shahridagi “Shedevr” choyxonasidagi jinoiy holat bo‘yicha ba’zi ma’lumotlar berildi. “Daryo” muxbirining xabar berishicha, unda viloyat IIB boshlig‘i, polkovnik Doniyor Toshxo‘jayev voqea tafsilotlarini ma’lum qildi.

Foto: Farg‘ona viloyati IIB matbuot xizmati

Qayd etilishicha, joriy yilning 5-fevral kuni tungi vaqtda Qo‘qon shahridagi “Marokash” choyxonasida bir necha yoshlar o‘rtasida janjal yuz bergan. Shu hududda xizmat olib borayotgan IIB xodimlari mashinasini ko‘rgan yoshlar janjalni to‘xtatishgan va “Shedevr” choyxonasida o‘zaro munosabatlarga oydinlik kiritishga urinishgan. Natijada, yoshlar o‘rtasidagi janjal ommaviy tus olgan. Janjal vaqtida 27 yoshli Z.M. tegishli tartibda ro‘yxatdan o‘tmagan qirqma ov miltig‘i bilan B.M., A.Q. va Sh.J.ga qarata ikki marotaba o‘q uzib, tan jarohati yetkazgan.

Foto: Farg‘ona viloyati IIB matbuot xizmati

Shifoxonaga borib jabrlanuvchilar bilan gaplashdik. Shu holatda ham bizdan asl vaziyatni berkitishga urinib, oilaviy janjal sabab uyidagi oynani sindirib, qo‘lini jarohatlab olganini aytdi. Biz aralashmasak, muammosini o‘zi hal qilib olarkan. Hamma muammosini o‘zicha hal qilib olaversa, qonun qayerda qoladi?

Choyxonani borib ko‘rdik. Hamma joy toshbo‘ron bo‘lib yotibdi. O‘z ko‘zingiz bilan ko‘rmasangiz tasavvur qila olmaysiz.

Voqea joyidagi kuzatuv kameralaridan olingan videotasvirlar ko‘p narsaga aniqlik kiritdi. Jabrlanuvchining o‘zi qo‘liga tosh bilan ‘dubinka’ ko‘tarib olib janjalni boshlaganlardan biri ekan

Hammasini qo‘lida ‘dubinka’, hammasini qo‘lida pichoq, hammasini qo‘lida tosh. Hammasini harakatlarida jinoyat alomatlari bor.

Doniyor Toshxo‘jayev, Farg‘ona viloyati ichki ishlar boshqarmasi boshlig‘i.

Foto: Farg‘ona viloyati IIB matbuot xizmati

Ma’lum qilinishicha, hodisa yuzasidan dastlab 30 nafar shaxs qo‘lga olingan. Viloyat prokuraturasi tomonidan 1 nafar shaxsga nisbatan Jinoyat kodeksining 25, 97-moddasi 2-qismining tegishli bandlari (Qasddan odam o‘ldirishga suiqasd) bilan, 2 nafar shaxsga nisbatan Jinoyat kodeksining 248-moddasi (Qurol, o‘q-dorilar, portlovchi moddalar yoki portlatish qurilmalariga qonunga xilof ravishda egalik qilish) bilan jinoyat ishi qo‘zg‘atilgan. 27 nafar shaxsga qamoqqa olish tarzidagi ehtiyot chorasi tanlangan.

14-fevral kuni o‘tkazilgan tezkor tadbirda mazkur ishga aloqadorligi taxmin qilingan 25 nafar shaxs aniqlanib, ularga nisbatan ma’muriy qamoq qo‘llanilgan.

Ta’kidlanishicha, mazkur hodisa ortidan viloyat hududi bo‘ylab shartli nom ostida “Tong” tadbirlari o‘tkazilmoqda. 18-fevralga qadar fuqarolardan 500 dan ortiq tig‘li va tan jarohati yetkazishi mumkin bo‘lgan jismlar olingan. 86 nafar shaxs bilan profilaktik suhbat olib borilgan. 35 nafar shaxsga ma’muriy qamoq, 10 nafariga ma’muriy jarima qo‘llanilgan.

Eslatib o‘tamiz, Qo‘qonda choyxonada janjallashgan erkak bir necha kishini ov miltig‘i bilan jarohatlagani haqida xabar berilgandi. Keyinroq Farg‘ona viloyati IIB axborot xizmati hodisa yuzasidan 30 nafar shaxsga nisbatan qamoqqa olish tarzida ehtiyot chorasi qo‘llanilganini ma’lum qilgandi.