Ijtimoiy tarmoqlar va bir nechta yangiliklar saytlarida Qirg‘iziston hukumati Issiqko‘l bo‘yidagi to‘rtta pansionatni xususiy investorlarga sotishni rejalashtirayotgani haqida xabarlar tarqaldi, deb yozadi Spot.

Foto: “Otpusk.uz”

“Shunisi e’tiborliki, 2016-yilning aprel oyida ushbu pansionatlar Qirg‘iziston Respublikasi tomonidan O‘zbekiston kompaniyalaridan qonunga xilof ravishda tortib olingan edi”, — deyiladi “Milliy bank”, “Asaka bank” va “O‘zsanoatqurilishbank” hamda Toshkent mexanika zavodi AJning qo‘shma press-relizida.

Press-relizda aytilishicha, “O‘zmilliybank” “Rohat-NBU” pansionati, “Asakabank” “Dilorom” pansionati, “O‘zsanoatqurilishbank” “Bo‘ston” pansionati, “Toshkent mexanika zavodi” AJ “Oltin qumlar” pansionatiga egalik qilgan hamda boshqargan.

Ushbu kompaniyalar, ayniqsa, 2016-yildan boshlab hozirga kungacha davom etayotgan arbitraj ishi sharoitida pansionatlar sotilishiga qat’iyan qarshi chiqdi.

Arbitraj ishi hukumat tomonidan pansionatlar mulkdorlaridan noqonuniy olib qo‘yilgani uchun tovon puli to‘lashni ko‘zda tutadi.

2019-yil 1-may kuni arbitraj tribunali O‘zbekiston mulkdor tashkilotlari foydasiga qaror chiqardi va nizoga nisbatan o‘z yurisdiksiyasini tasdiqladi. Hozirda sud ishi da’voni mohiyati bo‘yicha ko‘rib chiqishga tayyorgarlik ko‘rish jarayonida.

Xabarda qayd etilishicha, 1965-yilda qabul qilingan Vashington konvensiyasining 46 va 47-moddalariga muvofiq tomonlar birining talabiga binoan agar tomonlarning nizolarni va vakolatlarni hal qilish tartibi to‘g‘risidagi kelishuviga muvofiq bo‘lsa, arbitraj nizo mavzusiga bevosita bog‘liq bo‘lgan qo‘shimcha yoki qarama-qarshi talablar yuzasidan qaror qabul qiladi.

“Shu munosabat bilan O‘zbekiston kompaniyalari Qirg‘iziston hukumati tomonidan pansionatlarni sotishga qat‘iy e’tiroz bildirib, o‘z pozitsiyalariga amal qilishni davom ettiradi va bu masala bo‘yicha barcha huquqiy himoya vositalaridan foydalanish huquqini o‘zida saqlab qoladi”, deyiladi xabarda.