O‘zbekistonda mavjud jazoni ijro etish koloniyalari va tergov hibsxonalarida barcha qulayliklarga ega advokat va tergovchilar uchun 69 ta alohida xona tashkil etilgan. Tergov jarayoni va saqlash sharoitlarining shaffofligini ta’minlash, qiynoq va jismoniy tazyiq o‘tkazish bilan bog‘liq salbiy holatlarning oldini olish maqsadida 2 ming 989 ta zamonaviy videokuzatuv moslamasi o‘rnatilgan. Bu haqda 20-fevral, payshanba kuni, bo‘lib o‘tgan Yoshlar press-klubining navbatdagi sessiyasida ma’lum qilindi, deya Yoshlar media markazi matbuot xizmati “Daryo”ga xabar berdi.
Sessiyada ta’kidlanishicha, mahkumlarning murojaatlari, mavjud muammolarini o‘rganish va ularni ijobiy hal qilish yuzasidan Jazoni ijro etish bosh boshqarmasi tomonidan sayyor qabullar o‘tkazib kelinmoqda. Barcha qamoqxonalarda Ombudsman, Bosh prokuratura va Ichki ishlar vazirligiga yuboriladigan ariza, shikoyatlarga mo‘ljallangan alohida qutilar ham bor.
“Respublikadagi mehnatga layoqatli mahkumlarning 88 foizi yetarli sharoitga ega munosib ish bilan ta’minlangan. Ular qonunchilikka ko‘ra, haftasiga 40 soat ishga jalb etiladi. 2020-yilning 1-fevralidan boshlab, mehnatga haq to‘lashning eng kam miqdori 679 ming 330 so‘m etib belgilandi. Shundan kelib chiqib, 1-fevraldan mehnat qilayotgan mahkumlarga har bir ish kuni uchun 26 ming 815 so‘mdan ish haqi to‘lanyapti. Oylik maosh miqdori esa o‘rtacha 1 million so‘mdan 1,5 million so‘mgachani tashkil etmoqda. Shuningdek, mahkumlarning ish haqidan ijtimoiy sug‘urta ajratilmasligi belgilanib, pensiya ta’minotiga ega bo‘lishi ta’minlandi”, — dedi IIV Jazoni ijro etish bosh boshqarmasi rasmiysi Jamshid Sultonov.
Izoh (0)