Joriy yilning 19-fevralda Boku shahrida (Ozarbayjon) o‘zbek-ozarbayjon idoralararo muvofiqlashtiruv ishchi guruhining navbatdagi majlisi bo‘lib o‘tdi. Bu haqda IIV axborot xizmati xabar bergan.
Tadbirda O‘zbekiston Respublikasi Ichki ishlar vazirining birinchi o‘rinbosari Aziz Toshpo‘latov, Ozarbayjon tomonidan mamlakat Ichki ishlar vazirining birinchi o‘rinbosari Seyfulla Azimov raislik qildi.
Yig‘ilishda tomonlar terrorizm, ekstremizm va noqonuniy migratsiyaga qarshi kurashish sohasida O‘zbekiston va Ozarbayjon ichki ishlar vazirliklarining o‘zaro ma’lumot almashuvining amaldagi holati hamda kelgusida rejalashtirilayotgan ishlarni muhokama qilib, tezkor-qidiruv faoliyati bo‘yicha hamkorlikdagi vazifalarni ko‘rib chiqdilar.
Hamkorlik masalalari o‘zaro tashriflarning ijobiy natijasida ham nomoyon bo‘lmoqda. Jumladan, o‘tgan qisqa davr mobaynida 20 dan ortiq ikki tomonlama tashriflar uyushtirilgan bo‘lib, ularda ikki davlatning 60 dan ziyod ichki ishlar organlari xodimlari qatnashdi.
Tadbir yakuniga ko‘ra, ikki mamlakat ichki ishlar organlari hamkorligini rivojlantirishga qaratilgan majlis bayonnomasi imzolandi.
Tashrif davomida o‘zbek delegatsiyasi rahbari Aziz Toshpo‘latov Ozarbayjon Respublikasi Ichki ishlar vaziri Vilayet Eyvazov bilan ham uchrashdi.
Uchrashuvda O‘zbekiston Respublikasi Prezidenti Shavkat Mirziyoyevning 2019-yilning oktyabr oyida Ozarbayjonga tashrifi chog‘ida keng miqyosdagi, shu jumladan xavfsizlikka oid erilishgan ikki tomonlama kelishuvlaridan kelib chiqqan holda o‘zbek-ozarbayjon munosabatlariga tegishli masalalar ko‘rib chiqildi.
Tomonlar quyidagi bir qator yo‘nalishlarda hamkorlikni kuchaytirishni kelishib oldi:
- kiberjinoyatchilikka qarshi kurshishda tajriba almashish;
- odam savdosi va noqonuniy migratsiyaga qarshi kurashish;
- professional kadrlarni tayyorlash, qayta tayyorlash va malakasini oshirish;
- tezkor harakatlanuvchi bo‘linmalar xodimlarining o‘zaro o‘quv mashg‘ulotlarini tashkillashtirish va boshqalar.
Izoh (0)