Bloger Otabek Nuritdinov Andijon shahrining Asaka tumanidagi “Xolid ibn Valid” jome masjidi yaqinida spirtli ichimliklar do‘koni ochilgani haqida 18-fevral kuni post joylaganidan so‘ng do‘kon egalari tomonidan kaltaklangani haqida xabar berilgandi. Andijon viloyati IIB ushbu holat yuzasidan rasmiy ma’lumot berdi.
Holat yuzasidan Asaka tumani IIB tomonidan olib borilgan dastlabki surishtiruv davomida Otabek Nuritdinov murojaatida keltirgan spirtli ichimliklar bilan savdo qiluvchi do‘kon Asaka shahri Abdurahmon Jomiy ko‘chasida yashovchi “Xalilillo quvonchi” nomli xususiy korxonaga qarashli bo‘lib chiqqan. Do‘kon fuqaro Yu.D.ga tegishli. U 18-fevral kuni farzandlari A.X. va A.A. bilan birgalikda Nuritdinovning farzandi davolanayotgan To‘rttosh ko‘chasidagi shifoxonaga borgan. Otabek va uning onasi Matlubaxon bilan suhbatlashayotgan vaqtida Yu.D.ning o‘g‘li A.A. Otabekning yuz qismiga urib, tan jarohati yetkazganligi ma’lum bo‘lgan.
Shuningdek, surishtiruv davomida aniqlanishicha, Otabek Nuritdinov yuqorida tilga olingan do‘kon haqidagi suratni ijtimoiy tarmoqlar orqali ko‘rgan, sahifasiga joylagan va munosabat bildirgan. Natijada Yu.D. farzandlari bilan uning yashash manziliga kelgan va ular ichki ishlar organlari xodimlarini ro‘kach qilib, uni qo‘rqitmoqchi bo‘lishgani aniqlangan. Nuritdinov hozirda bunga ichki ishlar organlari aniqlik kiritayotganligini va ichki ishlar organlarining ushbu holatga aloqasi yo‘qligini ma’lum qilgan.
Holat bo‘yicha ayni vaqtda Asaka tumani IIB tomonidan tergovoldi surishtiruv harakatlari olib borilmoqda.
Eslatib o‘tamiz, Otabek Nuritdinov taxallusi ostidagi andijonlik bloger Abdufatto Nuritdinov shu yilning yanvar oyida tuhmat va haqoratda ayblanib, 15 sutkaga qamalib chiqqandi. Bloger o‘z postlarida asosan Asaka shahridagi mansabdorlar faoliyatidagi ehtimoliy korrupsion faktlar, budjet mablag‘larini o‘g‘irlash va talon-toroj qilish holatlari haqida yozgan.
Izoh (0)