Uxanda vaqtincha ochilgan shifoxonalardan birining rahbari COVID19 koronavirusi keltirib chiqargan kasallik oqibatida vafot etdi. Bu haqda “Jenmin Jibao” gazetasiga asoslanib “RIA Novosti” xabar bergan.

Foto: Sputnik

“Uchan” kasalxonasi direktori Lyu Chjimin 17-fevral kuni COVID19 koronavirusi bilan kasallanish oqibatida vafot etdi. U koronavirusdan o‘lim topgan birinchi tibbiyot muassasasi rahbari”, – deya yozgan nashr.

Lyu Chjimin

Foto: Global Look Press

Biroq keyinchalik Daily Mail nashrining yozishicha, gazeta ushbu xabarni o‘z rasmiy saytidan o‘chirib tashlagan. Xubey sog‘liqni saqlash departamenti vakili Lyu Chjimin vafot etmagani va reanimatsiyada og‘ir ahvolda ekanini bildirgan.

Xitoy hukumati 2019-yil 31-dekabrida Jahon sog‘liqni saqlash tashkilotiga Xubey provinsiyasining Uxan shahrida pnevmoniyaga sabab bo‘ladigan noma’lum koronavirus tarqalgani haqida xabar bergan. JSST koronavirusni xalqaro darajadagi favqulodda vaziyat deb baholab, virusga COVID-2019 rasmiy nomini bergan. Xitoy Milliy sog‘liqni saqlash komissiyasi ma’lumotlariga ko‘ra, so‘nggi bir sutka ichida mamlakatda koronavirus qurbonlari soni 142 kishiga ko‘payib, yana 1323 kishi kasallikni yuqtirib olgan. 16-fevral holatiga ko‘ra, Xitoyda 68 500 holatda koronavirus bilan xastalanish qayd etilgan, jahon bo‘yicha esa 69 mingdan ortiq inson virus bilan infeksiyalangan. Xitoyda koronavirus qurbonlarining umumiy soni 1665 kishiga yetgan, 9 419 kishi esa kasallikni yengib o‘tib, tuzalishga muvaffaq bo‘lgan.

Xitoyning materikli qismida koronavirusga chalinganlar soni 70,5 mingdan oshgan, 1 770 nafar odam kasallik oqibatida halok bo‘lgan, 10,8 ming nafar bemor undan tuzalib ketgan. Xitoydan tashqarida 700 ga yaqin odam koronavirus yuqtirib olgani aniqlangan.

Xitoydan tashqarida kasallanganlar soni bo‘yicha eng yuqori ko‘rsatkich Yaponiyada — 16-fevral holatiga ko‘ra, u yerda 338 kishi koronavirusni yuqtirib olgan. Singapurda 72 kishi, Gonkongda 56 kishi, Tailandda 33 kishi, Janubiy Koreyada 28 kishi aynan shu tashxis bilan kasalxonaga yotqizilgan.