So‘nggi bir sutkada Xubey provinsiyasida koronavirus oqibatida 100 kishi vafot etdi. Bu haqda Sog‘liqni saqlash mintaqaviy komissiyasining ma’lumotlariga tayanib, “RBK” xabar berdi.

Foto: AP

Ta’kidlanishicha, bu borada vaziyat 15-fevral kuniga qaraganda yaxshilangan. Xitoy hukumati 15-fevral kuni 139 bemorning o‘lganini tan olgandi.

Shu bilan birga ma’lum qilinishicha, virusni yuqtirib olganlar soni o‘tgan kunga nisbatan 5 foizga oshgan (1933). Ularning 90 foizi Uxan shahri hisobiga to‘g‘ri kelmoqda.

Xubey provinsiyasida jami 58 182 nafar odamda koronavirus qayd etilgan bo‘lib, ularning 1696 nafari vafot etgan. Provinsiyadan tashqarida jami 74 kishi vafot etgani aytilmoqda. Shuningdek, Gonkong, Tayvan, Fransiya, Yaponiya va Filippinda ham bemorlar vafot etgan.

Kuni kecha COVID-19 turiga mansub xavfli koronavirusdan eng ko‘p talafot ko‘rgan Xubey provinsiyasi hukumati shahar va qishloqlarda yashovchi fuqarolarning harakatlanishi uchun transport xizmatlaridan foydalanishni cheklab qo‘yish haqida qaror chiqardi.

Xitoy hukumati bergan ma’lumotlarga ko‘ra, 16-fevral holatiga ko‘ra, mamlakatda koronavirusga chalingan bemorlar soni 68,5 ming nafarga yetgan.