“Mening fikrim” jamoaviy murojaatlar portalida tabiiy gaz mavjud bo‘lmagan hududlardagi aholini is gazini sezadigan uskunalar bilan ta’minlash haqida petitsiya e’lon qilindi.
Unda aytilishicha, hozirda O‘zbekistonning chekka tumanlari-yu qishloqlaridan tortib, hatto markazlashgan tumanlarda ham tabiiy gaz bilan bog‘liq muammolar mavjud. Bu, o‘z navbatida, standartlarga javob bermaydigan isitish pechlaridan foydalanishga olib keladi. Natijada aholining is gazidan zaharlanish ehtimoli ortadi.
“Ma’lumki, to‘liq yonmagan o‘tin hamda ko‘mirdan rangsiz, hidsiz bo‘lgan gaz (is gazi) ajralib chiqadi. Ushbu is gazi inson salomatligiga jiddiy xavf soladi, ba’zan bunday holatlar o‘lim bilan yakun topadi. Har yili sovuq tushgan mavsumda yurtdoshlarimiz nostandart pechlardan foydalanishi oqibatida is gazidan zaharlanib halok bo‘lish holatlari ko‘payib bormoqda. Menimcha, bunday vaziyatlar yana takrorlanishini oldini olish shart va zarur”, — deydi petitsiya muallifi.
Is gazi hidsiz gaz bo‘lgani uchun uni zarur uskunalarsiz sezish mushkulligi, shu sababli tabiiy gaz mavjud bo‘lmagan hududlarga majburiy ravishda is gazini sezadigan moslama o‘rnatish kerakligi ta’kidlangan.
“Ushbu uskuna aholi turar joyining isitish pechlariga yaqin joyga o‘rnatiladi, agarda ana o‘sha joyda is gazi sizib chiqsa, uskuna darhol baland tovush chiqarib ogohlantirish signalini beradi. Yuqoridagilarni inobatga olgan holda ushbu uskunani aholiga bepul bo‘lmasa ham o‘zining tan narxida sotish va o‘rnatib berishni taklif qilamiz”, — deyiladi murojaatda.
Izoh (0)