COVID-19 turiga mansub xavfli koronavirusdan eng ko‘p talafot ko‘rgan Xubey provinsiyasi hukumati shahar va qishloqlarda yashovchi fuqarolarning harakatlanishi uchun transport xizmatlaridan foydalanishni cheklab qo‘yish haqida qaror chiqardi. Ushbu chora-tadbirlar hududda infeksiya tarqalishining oldini olish maqsadida amalga oshiriladi, deb yozmoqda “RBK”.
“Profilaktika choralari va epidemiyani provinsiya hududida nazorat qilish hal qiluvchi pallaga yetib keldi, ammo vaziyat hali ham jiddiyligicha qolmoqda. Infeksiya manbalarini samarali bartaraf qilish, uning tarqalishining va odamdan odamga yuqishining oldini olish, koronavirusning kasallikkacha yetib borishini bartaraf qilish uchun ham profilaktika va nazorat tadbirlari kuchaytirilgan”, — deyiladi hukumat bayonotida.
Yo‘llarda transportda harakatlanish faqat o‘t o‘chirish va avariyaviy qutqaruv xodimlariga, tez yordam va politsiya, shuningdek, xizmat mashinalari va jamoat transportiga ruxsat etilgan. Fuqarolarga ham harakatlanishning alohida rejimi joriy qilingan. Xususan, Xubeyda yashovchi aholi epidemiya bilan bog‘liq profilaktika qoidalariga amal qilishi shart.“Jamoat joylarida tibbiy niqoblarda yurishda davom etish, zarurat bo‘lmasa uylardan chiqmaslik, iloji boricha ommaviy tadbirlarda ishtirok etmaslik tavsiya qilinadi”, — deyiladi provinsiya hukumatining xabarida. Provinsiya aholisidan koronavirus belgilari kuzatilganda tezkorlik bilan tibbiyot xodimlariga murojaat qilish maslahat berilgan.
Mavzuga doir:
Yangi koronavirus 2019-yil dekabr oyi oxirlarida Xubey provinsiyasining markaziy shahri hisoblanmish Uxanda tarqalgan. Jahon sog‘liqni saqlash tashkiloti koronavirusni xalqaro doiradagi favqulodda holat deb topgan va juda ko‘p kasallik o‘choqlariga ega epidemiya deb atagan.
Mavzuga doir:
Izoh (0)