Toshkent shahar IIBB Facebook ijtimoiy tarmog‘ida tarqalgan poytaxtdagi maktablarning birida o‘quvchi qizlar o‘rtasidagi janjal tasvirlangan videoga munosabat bildirdi.

Foto: Toshkent shahar IIBB

Ta’kidlanishicha, 22 nafar o‘quvchi o‘rtasidagi janjal 2019-yilning 25-aprelida Yashnobod tumanidagi 230-sonli umumta’lim maktabida sodir bo‘lgan. Voyaga yetmaganlar ishi bo‘yicha profilaktika inspektorlari o‘sha vaqtda mojaro ishtirokchilarining oilasi bilan aloqa o‘rnatgan, bunday holatlar takrorlanishining oldini olish uchun profilaktik suhbatlar o‘tkazgan. Mojaro fakti bo‘yicha tekshiruv tashkil etilgan.

2019-yilning 14-iyul kuni Yashnobod tuman hokimligida janjal ishtirokchilari bo‘lgan 14 yoshli M.A., Z.S. va M.I., 15 yoshli R.R., M.M., M.N., va M.I., 16 yoshli Z.S., N.A., M.A. va X.I. bilan yig‘ilish o‘tkazilgan.

Aniqlanishicha, qizlar o‘rtasidagi kelishmovchilik videoda tasvirlangan vaqtdan oldin ham sodir bo‘lib turgan va maktab rahbariyati bundan xabardor bo‘lgan. Biroq o‘quvchi qizlar o‘rtasidagi mojaroni bartaraf etish bo‘yicha tegishli chora-tadbirlar ko‘rilmagan va shu sababli videoda janjal kelib chiqqan. Mojaro oqibatida 9-“B” sinf o‘quvchisi D.A.ga tan jarohati yetkazilgan.

Yig‘ilish davomida ota-onalar va ularning farzandlari o‘rtasida ishonchli munosabatlarni o‘rnatish muhimligi masalasi ko‘tarilgan. Ota-onalar ham ushbu mojaroga javobgar bo‘lganligi sabab janjalning asosiy ishtirokchisi bo‘lgan 11 nafar qizning ota-onalarini “Ma’muriy javobgarlik to‘g‘risida”gi kodeksning 47-modda 1-qismiga (Ota-ona qaramog‘idan mahrum bo‘lgan bolalar to‘g‘risidagi ma’lumotlarni vasiylik va homiylik organiga xabar qilmaslik) ko‘ra, jarimaga tortish belgilangan. O‘sha vaqtda jarima miqdori 608 197 so‘mni tashkil etgan.

Komissiyasi xulosasiga ko‘ra, maktab rahbariyatiga nisbatan ham tegishli chora ko‘rilgan — mojaro to‘g‘risida Toshkent shahar Xalq ta’limi bosh boshqarmasiga xabar berilgan.