Toshkentda “Prezident Murojaatnomasi: Harakatlar strategiyasining 3 yillik samarasi va 2020-yilga belgilangan ustuvor vazifalar” mavzusida xalqaro forum o‘tkazildi.
Forumda Xalq ta’limi vaziri Sherzod Shermatov ta’lim sohasidagi o‘zgarishlar haqida gapirdi, deb xabar bermoqda “Kun.uz”.
“Xususiy maktablarga “o‘gay boladek” qarab kelingan. So‘nggi 3 yil ichida xususiy maktablar oldidagi barcha to‘siqlar olib tashlandi. Oddiy misol litsenziya olish masalasi. Ilgari Vazirlar Mahkamasidan olinardi. Hozir hujjat topshirib, istalgan Davlat xizmatlari markaziga borib, litsenziya olinadi. Shu paytgacha xususiy maktablarning birortasi attestat bermagan, hozir xususiy maktablar davlat maktablari kabi attestat bera oladi. Bu sohaga raqobat kirib kelib, rivojlanish boshlanadi”, – dedi Shermatov.
Uning so‘zlariga ko‘ra, Xalq ta’limi vazirligi Osiyo taraqqiyot banki bilan Sergeli tumanida davlat-xususiy sherikchilik asosida yangi maktablarni qurish bo‘yicha loyiha boshlagan.
Izoh (0)