Rossiya va Xitoy o‘rtasidagi charter reyslarga qo‘yilgan vaqtinchalik taqiq rasmiy ravishda kuchga kirdi, deb xabar berdi “RBK”.

Foto: Reuters

Charter reyslar 14-fevraldan to‘xtatilishi haqida Rosaviatsiya rahbari Aleksandr Neradko ma’lum qilgan edi.

Ushbu taqiq 2019-nCoV koronavirusi tarqalishining oldini olish maqsadida joriy etildi.

14-fevraldan “Aeroflot”ning Moskvadan Pekin, Shanxay, Gonkong va Guanchjouga muntazam qatnovlari cheklanadi.

Shu bilan birga, to‘rtta Xitoy kompaniyasi uchun muntazam reyslar odatdagi tartibda amalga oshiriladi. Xitoydan kelgan yo‘lovchilarga xizmat ko‘rsatish uchun Sheremetyevo aeroportida izolyatsiya qilingan F terminali ajratildi.

Rossiya Xitoy bilan muntazam reyslarni 1-fevraldan cheklamoqchi edi, biroq keyinroq aviakompaniyalarga yo‘lovchilar uyiga yetib olishi uchun aviaqatnovni 14-fevralgacha davom ettirishga ruxsat berildi.

Shifokorlar 13-fevral tongi holatiga ko‘ra, yangi turdagi koronavirus sabab COVID-19 infeksiyasi bilan kasallangan jami 48 206 kishini ro‘yxatga olgan. O‘zbekistonda esa 13-fevral holatiga ko‘ra koronavirusga chalingan bemorlar yo‘qligi ma’lum qilingan.