Jahon mobil kongressi (Mobile World Congress, MWC) tashkilotchisi hisoblangan GSMA assotsiatsiyasi fevral oyida o‘tkazilishi rejalashtirilgan tadbir bekor qilinganini ma’lum qildi. Bu haqda MWC saytida xabar berildi.

Foto: AP

Ko‘rgazmaning bekor qilinishiga Xitoyda tarqalgan koronavirus epidemiyasi sabab bo‘ldi. Tashkilotchilarning fikricha, koronavirus tufayli yuzaga kelgan transport taqchilligi va boshqa holatlar tadbirni o‘tkazishga imkon bermaydi.

Bayonotda ta’kidlanishicha, ayni vaqtda Barselona va Ispaniyada xavfsiz va sog‘lom muhit hukmron, shu sababli hukumat ko‘rgazmani o‘tkazish orqali vaziyatni xavf ostiga qo‘yishni istamayapti.

Tashkilotchilarning aniqlik kiritishicha, 2020-yilga mo‘ljallangan tadbir keyinroq muddatga surilmaydi, balki butunlay bekor qilinadi. Keyingi ko‘rgazma 2021-yilda o‘tkaziladi.

Umumiy hisobda shifokorlar 13-fevral tongi holatiga ko‘ra, yangi turdagi koronavirus sabab COVID-19 infeksiyasi bilan kasallangan jami 48 206 kishini ro‘yxatga olgan. O‘zbekistonda esa 12-fevral holatiga ko‘ra koronavirusga chalingan bemorlar yo‘qligi ma’lum qilingan.