Sog‘liqni saqlash vazirligi 6-fevral kuni “Yordamchi reproduktiv texnologiyalardan foydalanish tartibi to‘g‘risida”gi nizomni tasdiqladi, deb xabar bermoqda Norma.
Eslatib o‘tamiz, yordamchi reproduktiv texnologiyalar (YRT)dan foydalanish O‘zbekiston qonunchiligiga 2019-yilning mart oyidan joriy etilgan edi. Ammo Oliy Majlis Senati tomonidan tasdiqlangan va sun’iy urug‘lantirishni ham o‘z ichiga olgan YRT tartibi ushbu qonunga kiritilmagan. “Gazeta.uz”ning yozishicha, YRTdan foydalanish tartibi SSV tomonidan belgilanishi ta’kidlangan.
Mavzuga doir: Elmira Bositxanova abort va “probirkadan” olinadigan bolalar masalasi xususida so‘z yuritdi
Mizojlar esa o‘z navbatida bepushtlik sabablarini aniqlash va YRTdan foydalanish maqsadida 5 turdagi birlamchi tekshiruvlardan o‘tkaziladi. Tekshiruv muddati 6 oydan oshmaydi. Agar bepushtlik sababi aniqlangan ayollarda konservativ va jarrohlik davolash o‘tkazilgandan so‘ng 9-12 oy davomida homiladorlik kuzatilmasa, ular ekstrakorporal urug‘lantirish usulini qo‘llashga yuboriladi.
O‘tkazilgan birlamchi tekshiruv natijasida bepushtlik sababi aniqlangan 35 va undan katta yoshdagi ayollar konservativ va jarrohlik davolash o‘tkazilmasdan, 9-12 oy muddatsiz shifokorlar konsiliumining qarori bo‘yicha YRT yordamida davolashga yuborilishi mumkin.Tekshiruv natijalariga ko‘ra, bemorlarda YRT yordamida davolash usullarini qo‘llashga qarshi ko‘rsatmalar aniqlanganda ularga YRT qo‘llash taqiqlanadi.
Tekshiruv natijalariga ko‘ra, YRT yordamida davolash usullarini qo‘llashga qarshi ko‘rsatmalar aniqlanmasa, quyidagi davolash usullari qo‘llaniladi:
- ekstrakorporal urug‘lantirish;
- sun’iy urug‘lantirish;
- xetching;
- kriokonservatsiya;
- spermatozoidning intratsitaplazmatik inyeksiyasi.
Izoh (0)