O‘zbekistondagi diniy qadamjolarga xorijdan keladigan ziyoratchilarga majmualarga “kirish vaqtida shartlarni qo‘yish” kerak. Bu haqda Vazirlar Mahkamasi huzuridagi Din ishlari bo‘yicha qo‘mita raisi birinchi o‘rinbosari Muzaffar Komilov 11-fevral kuni jurnalistlar bilan bo‘lib o‘tgan muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Muzaffar Komilovning ta’kidlashicha, O‘zbekistonga kelgan sayyohlar orasida shunchaki tarixiy obidalarni tomosha qilib, ular oldida suratga tushadiganlardan tashqari “muayyan bir ziyoratni amalga oshiradiganlari ham bor”. Ayniqsa Samarqanddagi Imom Buxoriy, Buxorodagi Naqshband, Yetti pir kabi majmualarda sayyohlar ziyorat tartib-qoidalariga rioya etishlari maqsadga muvofiq.
“Istanbulda diniy majmualarga erkaklarni shortik (kalta ishton)da kiritmaslik talabi qo‘yilganiga guvoh bo‘lganmiz. Buni ko‘rib xursand bo‘lgandim, ulardan o‘rganadigan joyimiz bor ekan... Demak, tarixiy obidalarimiz, diniy maskanlarimizga chetdan keladigan ziyoratchilarga kirish vaqtida shartlarimizni qo‘yishimiz kerak ekan”, — dedi Din ishlari bo‘yicha qo‘mita mas’uli.
Uning qo‘shimcha qilishicha, bu borada O‘zbekistonning sayyohlik kompaniyalari ham faollik ko‘rsatishi kerak — O‘zbekistonga kelmoqchi bo‘lganlar sayyohlarga: “Mana bunday paketlarimiz bor, lekin bunday talablarimiz ham bor”, deyishi maqsadga muvofiqdir. Shunda O‘zbekiston masjidlariga har xil holatda kirib, o‘tirib olgangan sayyohlarning suratlari internetlarda tarqalib ketmaydi, deb hisoblaydi Muzaffar Komilov.
Ma’lumot uchun, O‘zbekistonga 2018-yilda 5,3 million nafar, 2019-yilda esa 6,7 million nafar chet ellik tashrif buyurgan. Aholisi asosan musulmonlar bo‘lgan mamlakatlardan O‘zbekistonga keluvchilar soni ko‘paygani ta’kidlangan edi. Xususan, 2018-yilda Turkiyadan salkam 41,3 ming kishi, Pokistondan 5,5 ming kishi, Malayziyadan esa 2,7 ming kishi tashrif buyurgan edi.
Izoh (0)