Qashqadaryo viloyatining Mirishkor tumanidagi Chandir qishloq aholisini bir necha yillar davomida qiynab kelayotgan muammo Oliy Majlis deputati aralashuvi bilan hal etiladigan bo‘ldi. Bu haqda “Daryo”ga Mirishkor tuman hokimligi axborot xizmati rahbari Fayzulla Eshqulov xabar qildi.
Ma’lum bo‘lishicha, mirishkorliklar Oliy Majlis Qonunchilik palatasi deputati Mahfirat Xushvaqtova bilan uchrashdi.
Deputat uchrashuvda fuqarolar tomonidan yo‘llangan Chandir qishlog‘i markazidagi 3 kilometr yo‘lning ta’mirtalabligi, tuman hokimligi ushbu masalani haligacha hal etmayotganining sababi bilan qiziqdi. Hokimlik mas’ullari ushbu muammo 2020-yilning iyul oyiga qadar hal etilishiga va’da berdi.
Shuningdek, tumanning “Madaniyat” mahallasida istiqomat qilayotgan Zarnigor Sherqulova Qarshi davlat universitetining ekologiya va atrof-muhitni muhofaza qilish yo‘nalishini tamomlaganini, ammo ishga joylashishda muammoga duch kelayotganini aytdi. Oliy Majlis deputati so‘roviga javoban ushbu murojaatni hal etish vazifasi tuman hokimi o‘rinbosari Xurshid Sharopov zimmasiga yuklatildi va tez orada natija haqida ham xabar berish lozimligi ta’kidlandi.
Tadbirkor Zuhriddin Toshqulov esa tadbirkorlik faoliyatini kengaytirib, yangi ish o‘rinlarini yaratish uchun yer maydoni va kredit so‘rab murojaat qildi. Unga ham bo‘sh bino ajratiladigan bo‘ldi. 34-maktabda yoshlar yetakchisi sifatida ishlab kelayotgan Botir Rustamovga kutubxona tashkil etish uchun joy ajratib berish ham tuman mas’ullari zimmasiga yuklatildi.
Izoh (0)