Yunusobod tumanida jamoat tartibini saqlash yuzasidan xizmat vazifasini o‘tayotgan Milliy gvardiya harbiy xizmatchisi noma’lum shaxs qo‘lida pichoq bilan ayol kishini quvib kelayotganini ko‘rib, zudlik bilan ko‘ngilsizlikning oldini olishga harakat qiladi, deb xabar berdi Milliy gvardiya matbuot xizmati.
Noma’lum erkak ayolga yetib olgan paytda Milliy gvardiya harbiy xizmatchisi yetib kelib, ayolni pichoq bilan tahdid qilayotgan erkak qo‘lidan ajratib olgan. Ayolni o‘z himoyasiga olgan Milliy gvardiya harbiy xizmatchisini ko‘rgan tartibbuzar shu zahoti qochib ketgan, deyiladi xabarda.
Milliy gvardiya harbiy xizmatchisi A.X. shu hududdagi post-patrul ekipajiga holat yuzasidan xabar bergach, tartibbuzar ortidan ekipaj quvib, Yunusobod 9-dahada to‘xtatilgan. Fuqarodan qo‘lidagi pichoqni tashlash talab qilinganida, fuqaro Milliy gvardiya va PPX xodimi talabini bajarmasdan, haqorat qilib, ularni o‘ziga yaqinlashtirmaslik uchun tosh va boshqa qo‘liga ilingan narsalarni ota boshlagan.
Fuqaro uni ushlash vaqtida ichki ishlar xodimining oyog‘iga pichoq sanchib olgach, Milliy gvardiya harbiy xizmatchisi Yo.F. PR73 (rezina tayoq)ni ishlatishga majbur bo‘lgan. So‘ng tartibbuzarning qo‘lidagi pichoqni tortib olib, qo‘liga kishan solgan. Qo‘lga olingan shaxs Yunusobod tuman IIB bo‘limiga topshirilgan.
Olib borilgan surishtiruv ishlari natijasida fuqarolar Shayxontohur tumanida yashovchi er-xotin S.N. va S.A. ekanligi, eri spirtli ichimlik ichgani oqibatida o‘zaro janjallashib, shu holat yuzaga kelganligi ma’lum bo‘lgan.
Hozirda ushbu holat yuzasidan surishtiruv ishlari davom etmoqda.
Izoh (0)