Qirg‘izistonning birinchi prezidenti Askar Akayevning o‘g‘li Moskvada vafot etdi

Qirg‘izistonning sobiq prezidenti Askar Akayevning o‘g‘li Aydar Akayev 44 yoshda Moskva shahrida vafot etdi. Bu haqda “24.kg” nashri xabar berdi.

Dastlabki ma’lumotlarga ko‘ra, Aydar Akayevning o‘limiga yurak ish faoliyatining buzilishi sabab bo‘lgan. Boshqa tafsilotlar oshkor qilinmagan.

Aydar Akayev Qirg‘iziston moliya vaziri maslahatchisi lavozimida ishlagan, shuningdek qirg‘iz parlamenti yuqori kengashi deputati bo‘lgan. 2005-yil mart oyida Qirg‘izistonda hokimiyat o‘zgartirilgandan so‘ng barcha davlat lavozimlari va deputatlik vakolatlari bekor qilindi. Unga davlat hamda fuqarolarga zarar yetkazish bo‘yicha jinoiy ishlar ochildi.

Askar Akayev 1990-yildan 2005-yilgacha Qirg‘iziston prezidenti lavozimida ishlagan.