Qizilo‘rda—Pavlodar yo‘lining 203-kilometrida 37 nafar O‘zbekiston fuqarosi bo‘lgan avtobus to‘xtab qoldi, deya xabar bermoqda “Pavlodarnews.kz” viloyat politsiya departamentiga tayanib.
Hodisa 2-fevral, yakshanba kuni, kechqurun sodir bo‘lgan. Novosibirsk—Chimkent yo‘nalishida ketayotgan avtobusdagi nosozlik sababli haydovchi katta yo‘lda to‘xtashga majbur bo‘lgan.
Qayd etilishicha, shu kuni kechasi harorat -20 daraja sovuqqacha tushib ketgan. Voqea joyiga politsiya xodimlari, qutqaruvchilar va “Qozavtoyo‘l” xodimlari yetib kelgan. Barcha yo‘lovchilar Shiderti qishlog‘idagi isinish joyiga olib borilgan. Keyin esa yo‘l-yo‘lakay transportda Qarag‘andaga olib borilgan.
Shu yilning 14-yanvarida Qozog‘istonning Aqto‘be viloyatida 53 nafar o‘zbekistonlik bo‘lgan avtobus nosozlik tufayli to‘xtab qolgandi. 27-yanvarda esa 42 nafar o‘zbekistonlik bo‘lgan avtobus qorda qolib ketgani xabar berilgan edi.
Izoh (0)