O‘zbekiston Prezidenti Shavkat Mirziyoyev Xitoy Xalq respublikasi raisi Si Szinpinga mamlakatda tarqalgan koronavirus tufayli ko‘plab insonlarning halok bo‘lgani munosabati bilan hamdardlik maktubi yo‘lladi. Bu haqda Prezident matbuot xizmati xabar berdi.

Foto: Prezident matbuot xizmati

“Janobi Oliylari,

Xitoyda yangi turdagi koronavirus sababli kelib chiqqan kasallik tarqalishining fojiali oqibatlari to‘g‘risidagi tashvishli xabarlar O‘zbekiston Respublikasida alohida xavotir va qayg‘u bilan qabul qilinmoqda.

O‘zbekiston xalqi nomidan va shaxsan o‘z nomimdan ko‘plab insonlarning halok bo‘lgani munosabati bilan do‘st Xitoy Xalq respublikasi xalqiga chuqur hamdardlik bildiraman, barcha jabrlanganlarning tez fursatda shifo topishini tilayman.

Ushbu og‘ir damlarda O‘zbekiston xalqi sizga yelkadosh bo‘lib, xitoylik do‘stlarga chin dildan qayg‘udosh ekanini alohida ta’kidlashni istardim.

Sizning rahbarligingiz ostida ushbu xavfli pandemiyaga qarshi kurashish borasida ko‘rilayotgan mardona sa’y-harakatlar va samarali chora-tadbirlarni yuksak qadrlaymiz va to‘liq qo‘llab-quvvatlaymiz. Ushbu umumiy xatarni bartaraf etish maqsadida zarur ko‘mak ko‘rsatishga intilamiz.

O‘zbekiston hukumati ushbu kasallik tarqalishiga birgalikda qarshi kurashish choralarini Xitoy bilan yaqindan muvofiqlashtirishga tayyor.

Yana bir bor chuqur hamdardlik izhor etib, Sizning qat’iy harakatlaringiz tufayli buyuk xitoy xalqi ushbu qiyinchiliklarni tez fursatda munosib yengib o‘tishiga ishonch bildiraman”, — deyiladi maktubda.

Shavkat Mirziyoyev 31-yanvar kuni Davlat geologiya va mineral resurslar qo‘mitasidagi yig‘ilishda koronavirus masalasiga qisqacha to‘xtalib o‘tdi.

“Hozirgi koronavirus ko‘zimizni moshdek ochishi kerak”, — deb aytgan Prezident.

Davlat rahbarining aytishicha, bunda qaysi yo‘nalish bo‘yicha nimalar qilinishi kerak, nimalar ixtiro qilinishi kerak — shu kabi masalalarga tayyor bo‘lish lozim.

“Xalqimizning xavfsizligini o‘ylashimiz kerak”, — deb ta’kidlagan edi Shavkat Mirziyoyev.

Avvalroq Xitoyda bir sutka davomida koronavirus tufayli 46 kishi vafot etgani haqida xabar berilgan edi. Shu tariqa mamlakatda mazkur kasallik qurbonlari soni 259 kishiga yetdi.

Sog‘liqni saqlash vazirligi O‘zbekistonda koronavirus kirib kelishiga qarshi ehtiyot choralari yanada kuchaytirilishini ma’lum qildi.