Qashqadaryo viloyati IIB axborot xizmati tarmoqlarda “Farzandi ko‘z oldida xo‘rlangan ayol” sarlavhasi ostida tarqalgan videotasvirga munosabat bildirdi.
2019-yil 26-iyun kuni tungi soat 02:00 larda Yakkabog‘ tumani “Chinobod” mahalla fuqarolar yig‘ini Shamanqirg‘iz qishlog‘ida yashovchi, 1980-yilda tug‘ilgan Sobir Ochilov spirtli ichimlik iste’mol qilib, jamiyatda yurish-turish qoidalarini qasddan mensimasdan hech bir sababsiz qo‘shnisi Sharofat Ochilovaning yashash uyiga kirgan.
Uy hovlisidagi o‘rnatilgan so‘rida ikki nafar farzandi bilan uxlab yotgan Sharofat Ochilovaning oldiga borib, uni haqorat qilib, tanasining turli joylariga bir necha marotaba qasddan urib, unga sog‘liqning qisqa muddatga yomonlashuviga olib kelmagan yengil shikast yetkazib, hodisa sodir bo‘lgan joydan yashiringan.
Tayinlangan sudga oid tibbiyot ekspertizasining 2019-yil 2-iyuldagi xulosasida Sharofat Ochilovada yuzining o‘ng tomon pastki jag‘ burchak sohasida, yuzining chap yonoq sohasida shilinma, chap quloq suprasi old yuzasida, bo‘yinning old yuzasi pastki qismida qontalashlar ko‘rinishidagi jarohatlari mavjud bo‘lib, og‘irlik darajasiga ko‘ra, sog‘liqni qisqa muddatga yomonlashuviga olib kelmagan yengil tan shikasti guruhiga kiritilishi ko‘rsatilgan.
Mazkur holat Yakkabog‘ tumani IIBda 29-iyun kuni qayd etilgan.
Mazkur holat yuzasidan dastlab Yakkabog‘ tuman IIB HPB TP profilaktika inspektori katta leytenant Sh.Mardonov tomonidan tergovga qadar tekshiruv harakatlari olib borilib, to‘plangan hujjatlar bo‘yicha 8-iyul kuni jinoyat ishini qo‘zg‘atishni rad qilib, fuqaro Sobir Ochilovga nisbatan Ma’muriy javobgarlik to‘g‘risidagi kodeksning tegishli moddalari bo‘yicha ma’muriy chora ko‘rish uchun to‘plangan hujjatlar Yakkabog‘ tumani ma’muriy sudiga yuborilgan.
Yakkabog‘ tuman ma’muriy sudining 16-iyuldagi ajrimiga asosan to‘plangan hujjatlar fuqaro Sobir Ochilovni harakatlarida Jinoyat kodeksining 277-moddasi 1-qismida ko‘rsatilgan jinoyat alomatlari mavjudligi ko‘rsatilib, qo‘shimcha tergovga qadar tekshiruv harakatlarini olib borish uchun tuman IIBga qaytarilgan.
Mazkur holat yuzasidan Yakkabog‘ tumani IIB huzuridagi Tergov bo‘limi tergovchisi kapitan D.S.Poyonov tomonidan tergovga qadar tekshiruv harakatlari olib borilib, 3-noyabr kuni fuqaro Sobir Ochilovga nisbatan Jinoyat kodeksining 277-moddasi 1-qismi (Bezorilik) bilan jinoyat ishi qo‘zg‘atilgan.
Jinoyat ishi bo‘yicha fuqaro Sharofat Ochilova jabrlanuvchi deb topilgan.
Jinoyat ishi bo‘yicha 2019-yil 11-dekabrda fuqaro Sobir Ochilov ayblanuvchi tariqasida ishda ishtirok etishga jalb qilinib, unga Jinoyat kodeksining 277-moddasi 2-qismi “g” bandi bilan ayblov e’lon qilingan va jinoyat ishi 12-dekabrdagi ayblov xulosasi bilan Jinoyat-protsessual kodeksining 381-moddasi (Jinoyat ishining prokurorga yuborilishi) tartibida sud muhokamasiga yuborilgan.
Izoh (0)