Farg‘ona viloyati ichki ishlar boshqarmasi boshlig‘i, polkovnik Doniyor Toshxo‘jayev jurnalist va blogerlar bilan “Ochiq va shaffof hamkorlikdamiz” mavzusida matbuot anjumani o‘tkazdi.
O‘zAning yozishicha, Toshxo‘jayev viloyatdagi ikki holat uni tashvishga solayotganini ta’kidladi.
“Ish boshlaganimga qisqa vaqt bo‘lgan bo‘lsa-da, shahar va tumanlardagi vaziyat bilan tanishish harakatidaman. Huquqbuzarlik va jinoyatchilikka qarshi kurashish bo‘yicha olib borilayotgan ishlar va raqamlarga to‘xtalmoqchi emasman.
Viloyatda yo‘l-transporti va tig‘li narsalar bilan bog‘liq noxush holatlarning ko‘p uchrayotgani tashvishlanarlidir. Ish boshlagan birinchi kunim Qo‘qon shahrida piyodalarga yo‘l bermaslik, qoidalarga amal qilmaslik, bozorlardagi avtoturargohlarning tirbandligini ko‘rdim.
Qoidabuzarliklar juda ko‘p. Jarima solish oson, ammo fuqarolarimizda qonunlarga hurmat, huquqiy ong va madaniyatni shakllantirishimiz kerak.
Ma’lumotlarga qaraganda, viloyatda o‘tgan yilda 983 ta yo‘l-transport hodisasi sodir bo‘lgan. Bundan 230 tasi o‘lim, 842 tasi turli tan jarohatlari bilan yakunlangan”, — dedi Doniyor Toshxo‘jayev.
Ma’lumot uchun, Doniyor Toshxo‘jayev 22-yanvar, chorshanba kuni Farg‘ona viloyati Ichki ishlar boshqarmasi boshlig‘i lavozimiga tayinlandi. Bunga qadar u IIV huzuridagi Tergov departamenti boshlig‘i lavozimida faoliyat yuritgan.
Izoh (0)