Toshkent davlat pedagogika universitetida O‘zbekiston Respublikasi xalq ta’limi vaziri Sherzod Shermatov ishtirokida “Vazir va yoshlar” uchrashuvi bo‘lib o‘tdi, deb xabar qilgan O‘zA.
Mazkur dastur doirasida xalq ta’limi vaziri Sherzod Shermatovning yoshlar bilan ochiq muloqot o‘tkazish grafigi ishlab chiqilgan.
Yoshlar bilan uchrashuv doirasida xalq ta’limi vaziri bo‘lajak o‘qituvchilarga xalq ta’limi tizimida olib borilayotgan islohotlar haqida so‘zlab berdi. Shuningdek, talabalarga jamiyatimizda o‘qituvchilar obro‘sini oshirish, maktab infratuzilmasi va o‘quv dasturlarini takomillashtirish bo‘yicha amalga oshirilayotgan ishlar haqida ham ma’lumot berildi.
Ochiq muloqotda maktabda o‘qituvchi bo‘lib faoliyat yuritayotgan talabalar tizimdagi mavjud muammolar bo‘yicha vazirga savol berdi.
Vazir tizimda turli lavozimlarda bo‘sh ish o‘rinlari mavjudligini ta’kidlagan holda, yosh mutaxassislarni tizimni rivojlantirish uchun o‘z hissalarini qo‘shishga chaqirdi.
Fevral oyida umumiy o‘rta ta’lim maktablarida faoliyat yuritayotgan yosh direktorlar bilan, mart oyida fan olimpiadalari g‘oliblari va ishtirokchilari, aprel oyida umumiy o‘rta ta’lim maktablarida faoliyat yuritayotgan va tahsil olayotgan yosh xotin-qizlar, may oyida umumiy o‘rta ta’lim maktablarining bitiruvchilari, iyun oyida esa Mehribonlik uylari tarbiyalanuvchilari bilan uchrashuvlar o‘tkaziladi.
Uchrashuv savol-javoblarga boy bo‘ldi. Talabalar yuqori sinf o‘quvchilari uchun stipendiyalar joriy etish taklifini bildirdi.
Vazir bu taklifga fikr bildirar ekan, “Agar qaysidir darajada moddiy resurslar ortib qoladigan bo‘lsa, uni avvalo o‘qituvchining oylik maoshini oshirishga yo‘naltirish taklifini bergan bo‘lardim”, dedi.
Shuningdek, talabalar ishga kirish jarayoni juda murakkab bo‘layotgani, ortiqcha hujjatlar talab etilayotgani xususida tanqidiy fikr bildirdi.
“Qaysidir maktab rahbari ortiqcha hujjatlarni talab qilayotgan bo‘lsa, fakt bilan buni o‘rganib chiqamiz. Agar shunday vaziyat bo‘lsa, bunda korrupsiya yoki tanish-bilishchilik illati bo‘layotgan bo‘lishi mumkin”, – dedi Sherzod Shermatov.
Xalq ta’limi vaziri uchrashuvda ayni savolga javob berdi va xususiy maktablar haqida tanqidiy va tahliliy fikrlarini bildirdi. Vazir xususiy maktablardan davlat maktablariga o‘quvchilarning qaytishini tadbirkorlar tomonidan xususiy maktab biznes sifatida qabul qilinganda yaxshi oqibatlarga olib kelmasligi bilan izohladi.
Shuningdek, “Maktablar texnik jihatidan to‘liq jihozlanganmi?”, degan savolga “Keling, yerga tushaylik... Sharoitlar hozir universitetingizda ham to‘liq emas. Ochiq aytaman, maktablarda sharoit qoniqarli emas. Hammasi yaxshi demaylik. Hozir ochiqlik siyosati bo‘lyapti. Pul ajratilyapti. Endi yaratyapmiz”, — deya javob berdi.
Uchrashuvda darsliklar, undagi xatolar, chop etuvchi nashriyotlar muharrirlarining mas’uliyati, darsliklarning sotilishi va elektron darslik yaratishdagi ishlar haqida ham so‘z bordi.
Izoh (0)