Toshkent viloyati Parkent tumanida 24-yanvar kuni soat 19:30 larda noma’lum haydovchi boshqaruvidagi mashina Navbahor qo‘rg‘onidan Qoraqalpoq qishlog‘i tomon harakatlanayotgan piyoda 50 yoshli I.X.ni urib yuborgan. Haydovchi piyodaga yordam ko‘rsatmasdan voqea joyidan qochib ketgan.

Foto: Toshkent viloyati IIBB YHXB

To‘rt farzandning otasi I.X. olgan tan jarohatlari oqibatida shifoxonada vafot etgan.

Noma’lum haydovchini aniqlash uchun Toshkent viloyati IIBB Yo‘l harakati xavfsizligi boshqarmasi xodimlari hodisa yuz bergan joy yaqinidagi kuzatuv kameralari videoyozuvlarini o‘rganib chiqdi. Voqea sodir bo‘lgan vaqtda shu yo‘ldan davlat raqami va rangi noma’lum “Jiguli” mashinasi o‘tgani aniqlandi. Parkent tumanida ro‘yxatdan o‘tgan “Jiguli” avtomobillari orasida I.X.ni urib yuborgan mashina topilmadi.

Toshkent viloyati IIBB YHXB axborot xizmati boshlig‘i Rustam Asqarovning “Daryo”ga ma’lum qilishicha, 28-yanvar kuni Yuqori Chirchiq tumanida YPX inspektorlari tomonidan tekshirish uchun to‘xtatilgan kulrang “Jiguli” qochib ketishga harakat qilgan. Inspektorlar mashinani quvib yetib, haydovchi bilan suhbatlashganda 24-yanvardagi YTH u tomonidan sodir etilgani ma’lum bo‘lgan.

30 yoshli parkentlik E.J. O‘rta Chirchiqda ro‘yxatdan o‘tkazilgan “Jiguli” mashinasini ishonchnoma asosida boshqarib yurgan. 24-yanvarda I.X.ni urib yuborgach, hodisa joyidan qochib ketib, mashinasini ta’mirlashga kirishgan. Avtomobilning old oynasini o‘zi almashtirgan. Ustaxonada mashinasini ta’mirlatganidan so‘ng ortga qaytayotganida uni inspektorlar to‘xtatgan.

E.J.ga nisbatan Jinoyat kodeksining 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) va 117-moddasi 2-qismi (Xavf ostida qoldirish odam o‘limiga sabab bo‘lishi) bilan jinoyat ishi ochilgan. U haydovchilik guvohnomasidan mahrum qilinib, bir necha yilga ozodlikdan mahrum etilishi mumkin. Hozirda Parkent ichki ishlar bo‘limi huzuridagi Tergov bo‘limi tomonidan tergov harakatlari olib borilmoqda.