Ijtimoiy tarmoqlarda elektr o‘chgani tufayli teleradiokompaniya efirlarida uzilish bo‘lgani aytildi. Energetika vazirligi ushbu ma’lumotni inkor etdi

28-yanvar kuni ijtimoiy tarmoqlarda “O‘zTVda ‘svet’ o‘chib qoldi, efirda 1 soatlik uzilish bo‘ldi” sarlavhali material e’lon qilindi. Unda O‘zbekiston milliy teleradiokompaniyasida elektr o‘chib qolgani uchun mamlakat bo‘ylab 27-yanvar kuni soat 17:00 dan 18:00 gacha televizor ekranlari qop-qora bo‘lib turgani aytilgan.

Energetika vazirligi matbuot xizmati ushbu xabarga munosabat bildirdi.

Qayd etilishicha, O‘zbekiston milliy teleradiokompaniyasi joylashgan Shayxontohur tumani hududida 27-yanvar kuni elektr ta’minotida umuman uzilish bo‘lmagan.

Shuningdek, O‘zbekiston milliy teleradiokompaniyasi elektr ta’minotining mustahkamligi yuqori bo‘lib, 4 ta alohida kirib kelgan yuqori kuchlanishli elektr tarmoqlariga ulangan.

Qolaversa, elektr ta’minotida uzilish kuzatilganda ham markaziy teleradiokompaniya zaxira manbayiga ega bo‘lib, u avtomatik ravishda elektr ta’minotiga ulanishini ma’lum qilamiz, deyiladi xabarda.

Eslatib o‘tamiz, 2019-yilning 27-noyabr kuni elektr ta’minotidagi uzilish tufayli Toshkentda TV orqali jonli efirda ko‘rsatilayotgan saylov debati elektr o‘chgani sabab uzilib qolgan edi. O‘shanda Energetika vazirligi ushbu holatni elektrotexnik qurilmalar nosozligi bilan izohlagan.