Braziliya janubi-sharqida o‘tgan haftada kuchaygan suv toshqinlari oqibatida halok bo‘lganlar soni 63 nafarga yetdi, deb xabar berdi “TASS”.
Eng ko‘p qurbonlar, ya’ni 52 kishi Minas-Jerays shtatida qayd etilgan. Ushbu shtatning yuzdan ortiq munitsipalitetida favqulodda holat e’lon qilingan.
Qariyb 29 ming kishi ko‘chki xavfi tufayli uylaridan evakuatsiya qilingan. To‘rt mingdan ortiq kishi uysiz qoldi.
O‘tgan haftada yomg‘irlar boshlangan Espiritu-Santu shtatida 9 kishi halok bo‘lgan. Ushbu hududda 13 ming kishi uylarini tashlab ketishga majbur bo‘lgan. Ulardan 1,5 ming kishi yangi uyga ehtiyoji borlar ro‘yxatiga tushgan.
Shtat gubernatori Renatu Kazagrandining baholashiga ko‘ra, toshqinlar oqibatlarini bartaraf etish uchun 125 million dollar talab qilinadi.
Rio-de-Janeyro shtati shimolida tabiiy ofat tufayli yana ikki kishi vafot etgan. U yerda ham aholini ommaviy evakuatsiya qilish ishlari olib borilmoqda. Jabrlanganlar soni 13 ming kishini tashkil etgan.
Mamlakatning shimoliy, markaziy va janubi-sharqiy qismlarida yozda ko‘p miqdordagi yog‘ingarchilik mavsumiy bo‘lib, har yili turli darajadagi intensivlik bilan takrorlanadi. Bunga sabab Amazoniyaning ekvatorial o‘rmonlaridan janubi-sharqiy yo‘nalishda, Atlantika okeaniga qarab issiq nam havoning harakatlanishi hisoblanadi.
Avvalroq ushbu suv toshqinlari oqibatida 57 kishi halok bo‘lgani haqida xabar berilgan edi.
Izoh (0)