O‘zbekiston koronavirus tufayli xitoylik sayyohlarning bir qismini yo‘qotishi mumkin

Xitoy hukumati mamlakat tashqarisida mehmonxonalar bron qilish va turlarda ishtirok etishni taqiqlash orqali koronavirus tarqalishini cheklashga urinmoqda, deb xabar berdi Spot The New York Times’ga asoslanib.

Shuningdek, poytaxtda epidemiya tarqalishining oldini olish maqsadida Pekin va boshqa provinsiyalar o‘rtasida avtobus qatnovlari qisqartirilgan.

Shu bilan birga, yo‘llanmalar bo‘yicha xorijiy mamlakatlarda bo‘lib turgan Xitoy fuqarolariga ularning muddatini uzaytirishga ruxsat berilgan.

“Forbes.kz” virus tufayli turizm sanoati zarar ko‘rishi mumkinligi haqida yozmoqda.

Bunda gap alohida mamlakat haqida emas, butun dunyo haqida ketmoqda. Zarar yalpi ichki mahsulotining qariyb 11 foizini turizm tashkil qiladigan Xitoydan tortib, xitoyliklar o‘rtasida ommabop hisoblanuvchi Janubi-Sharqiy Osiyo, Yevropa mamlakatlari va AQShgacha taalluqli.

2018-yilda xitoylik sayyohlar 149 millionta sayohatni amalga oshirib, buning uchun xorijiy mamlakatlarda 130 milliard dollar sarflagan.

Bu mablag‘larning aksariyat qismi Yangi yil ta’tillari chog‘ida sarflangan.

Davstatqo‘m ma’lumotlariga ko‘ra, 2019-yilda Xitoy O‘zbekistonga fuqarolari eng ko‘p tashrif buyurgan davlatlar beshtaligiga kirgan.

O‘tgan yilda O‘zbekistonga 61,9 ming nafar xitoylik kelgan. 2019-yilda O‘zbekistonga sayohatga kelgan xorijliklarning umumiy soni 8,2 million kishini tashkil etgan.

Ekspertlarning fikricha, xavotirlanish uchun asos unchalik katta emas— Jahon sog‘liqni saqlash tashkiloti Uxandagi koronavirus epidemiyasini mintaqaviy favqulodda holat deb hisoblashdan bosh tortgan.

Xitoy hukumatining radikal harakatlari esa virus ko‘lami kengayib ketishining oldini olishga qaratilgan.

Xitoy olimlarining fikriga ko‘ra, epidemiya mart, uzog‘i bilan mayga qadar davom etadi.

Avvalroq Xitoyda koronavirusdan vafot etganlar soni 106 kishiga yetgani xabar berildi. Jahon sog‘liqni saqlash tashkiloti (JSST) koronavirusning global xavfini baholash bilan bog‘liq hujjatlarda xatoga yo‘l qo‘yilganini va u qayd etilganidek o‘rtacha emas, yuqori ekanini tan oldi.

Germaniyada koronavirus bilan kasallanishga oid ilk holat tasdiqlandi. TIV Uxandan O‘zbekistonga qaytgan talabalarga zudlikda SSV bilan bog‘lanishni tavsiya qildi.