2020-yil 25-yanvar kuni Amerikadagi bir nechta OAV, jumladan, Associated Press agentligi AQSh prezidenti ishtirokidagi bir yarim soatlik videoni e’lon qildi. Unda 2018-yil aprel oyida Vashingtondagi Trump Hotel’da o‘tgan tushlik aks etgan. Yozuvda Donald Tramp o‘z advokati Rudolf Julianining hamkori Lev Parnas bilan suhbatda Ukrainadagi Amerika elchisi Mari Yovanovichni zudlik bilan chaqirib olishni talab qilgan. Ushbu gaplargacha Parnas prezidentga Yovanovichning Kiyevda tez orada Trampga nisbatan impichment e’lon qilinishi haqida gap tarqatib yurganligini aytgan. Taxminlarga ko‘ra, Tramp Yovanovichning kimligi haqida ma’lumotga ega bo‘lmagan va ushbu xabarga keskin munosabat bildirib, Parnasga javob tariqasida:
“Undan qutuling! Ertagayoq! Buni qanday qilishingiz meni qiziqtirmaydi”, – degan.
Videoning Julianining boshqa bir hamkori Igor Fruman tomonidan tasvirga olingani taxmin qilinmoqda. Kelib chiqishi Sobiq ittifoq mamlakatlariga borib taqaluvchi amerikalik ikki biznesmen Parnas va Fruman 2019-yil oktabr oyida hibsga olingan va ayni vaqtda Respublikachilar partiyasining saylovoldi fondiga qilingan xayriya pullari haqidagi ma’lumotlarni qalbakilashtirishga aloqadorlikda gumon qilinib, tergovga jalb etilgan.
Video Donald Trampga impichment e’lon qilinayotgani tufayli oshkor etildi. AQSh senati 2019-yil dekabr oyida vakillar palatasi ma’qullagan impichmentni muhokama qilmoqda. Tramp o‘z vakolatini suiiste’mol qilganlikda va AQSh saylovlariga xorij davlatlarining aralashuviga aloqadorlikda ayblanmoqda. Ayblovlar Ukrainaning Burisma neft-gaz kompaniyasiga aloqador, ushbu kompaniya direktorlar kengashi tarkibiga Trampning 2020-yildagi prezidentlik saylovlaridagi asosiy raqobatchisi Jo Baydenning o‘g‘li Xanter Bayden bo‘lgan. Tramp Ukraina prezidenti Vladimir Zelenskiy bilan 2019-yil iyul oyida qilgan suhbatida Ukrainaga ko‘rsatiladigan harbiy yordam uchun AQShning Xanter Baydenga nisbatan jinoiy ish ochishida ko‘mak so‘rab hamkasbiga bosim o‘tkazganlikda ayblanmoqda.
Trampning Ukraina hukumati bilan muzokaralaridagi vositachisi uning advokati Rudolf Juliani bo‘lgan. O‘sha vaqtda AQShning Ukrainadagi elchisi bo‘lgan Mari Yovanovich ushbu harakatlarga keskin qarshilik ko‘rsatgan. Videoda e’lon qilingan suhbatdan bir yil o‘tib, 2019-yil bahorida Yovanovich AQShning Ukrainadagi elchisi lavozimidan chaqirib olindi. Yovanovich vakillar palatasida impichment bo‘yicha eshituvlar vaqtida Ukrainada Tramp haqida salbiy fikrlar aytmagani, lekin AQSh davlat departamenti xavfsizlik nuqtayi nazaridan uni mamlakatga chaqirib olganini aytgan.
Izoh (0)