O‘zbekistonda Humo Air tovar belgisi va saytini jismoniy shaxs sotib oldi. Yangi avikompaniya boshqa nom topishga majbur bo‘lishi mumkin

O‘zbekistonda “humoair.uz” sayti ishga tushdi, deb xabar bermoqda Spot. Saytda ko‘rsatilishicha, u reklama agentligiga tegishli.

Abdulla Aripov 18-yanvar, shanba kuni yangi Humo Air aviakompaniyasi tashkil etilishini e’lon qilgan edi. Shu kuni qandaydir jismoniy shaxs “humoair.uz” domenini ro‘yxatdan o‘tkazgan. Oradan ikki kun o‘tib Humo Air tovar belgisini ro‘yxatdan o‘tkazish bo‘yicha talabnoma kiritilgan.

Bunga parallel ravishda Vazirlar Mahkamasining Humo Air MChJ yangi avikompaniyasi yaratilishini tasdiqlovchi qarori chiqdi. Hujjatga ko‘ra, yangi tashkil etiladigan aviakompaniyaga ichki reyslar uchun “An-2” rusumli 43 ta samolyot va boshqa mulklar o‘tkazib berilishi kutilmoqda.

Intellektual mulk mutaxassislarining fikriga ko‘ra, aviakompaniyadan domen va tovar belgisi ilib ketilgan bo‘lsa ham, hech qanday huquqlar buzilmasdan, qonun doirasida amalga oshirilgan. Chunki domen va tovar belgisi ro‘yxatdan o‘tkazilgan vaqtda kompaniya yo‘q edi.

Shuningdek, ularning ta’kidlashicha, domen va tovar belgisi bitta shaxsga tegishli bo‘lsa, yangi tashkil etiladigan aviakompaniya har ikkalasini sotib olishga yoki Humo Air nomidan voz kechib boshqa nom topishiga to‘g‘ri keladi.