“Daryo” nashrida “Buxoroda 120 milliard so‘mga yangi bozor qurildi. Ammo hamon ko‘cha savdosi avjida” sarlavhali maqola e’lon qilingandi. Buxoro viloyat hokimligi mazkur maqolaga e’tibor qaratdi.
Hokimlik axborot xizmatining yozishicha, “G‘ijduvon dehqon bozori” Prezidentning 2017-yil 27-martdagi “2017—2019-yillar davrida dehqon bozorlarini rekonstruktsiya qilish va ularning hududida zamonaviy savdo majmualari qurish dasturini tasdiqlash to‘g‘risida”gi qarori ijrosini ta’minlash maqsadida 3 bosqichda qurilib, foydalanishga topshirilgan.
— Barcha imkoniyatlar yaratilganiga qaramasdan, ko‘chada savdo qiluvchilar, shuningdek, yangi bozorning orqa tomonida joylashgan ta’mirga muhtoj, buzilishi lozim bo‘lgan yengil tipdagi pavilyonlarda savdo qilishdan to‘xtashni istamagan tadbirkorlar o‘rtasida turli noroziliklar kuchaydi, — deyiladi viloyat hokimligi munosabatida. — Haqiqatan, “Daryo”da e’lon qilingan maqolada ko‘rsatilganidek, kechagi kunga qadar “G‘ijduvon dehqon bozori” orqa tomonida joylashgan va qariyb 2 gektardan ziyod joyni egallab turgan kichik bozor eski, xarob va e’tibortalab ahvolda edi. Tartibsiz, yong‘in xavfsizligi va sanitariya-gigiyena talablariga javob bermaydigan kichik bozorni zamonaviy ko‘rinishga keltirish uchun ayrim tadbirkorlarning injiqliklari to‘siq bo‘lib kelayotgan edi.
Aytilishicha, “Daryo”da e’lon qilingan maqoladan so‘ng maxsus shtab tashkil etilgan.
“Zudlik bilan tuman hokimi, sektor rahbarlari, soliq va huquqni muhofaza qiluvchi organlar hamda tegishli tashkilotlar bilan maxsus shtab tashkil etildi. “G‘ijduvon dehqon bozori”ning ma’muriy binosi oldidagi avtoturargoh va yo‘llarda, ko‘chada savdo qiluvchi tadbirkorlar o‘rtasida targ‘ibot ishlari olib borilib, tartib o‘rnatildi.10-yanvar kuniyoq avtoturargoh va yo‘l orasidagi archalar o‘rnatilgan maydonlarda ko‘cha savdosi bilan shug‘ullanishning oldi olindi. Yo‘llarda piyodalar va avtomobillarning harakatlanishi uchun qulay sharoitlar yaratildi. Ochiq ayvon ostidagi rastalar atrofida vaqtincha foydalanish uchun o‘z mahsulotlari xavfsizligini ta’minlash maqsadida noqonuniy qurilgan yengil tipda qurilgan do‘konlar tadbirkorlar tomonidan olinmoqda. G‘ijduvonda aholi va tadbirkorlarga qulay shart-sharoit yaratish maqsadida bozor atrofi va ichki yo‘llarda ta’mirlash va obodonlashtirish, zamonaviy arxitektura loyihalari asosida ikki tomonlama yo‘llar va ko‘cha chiroqlarini o‘rnatish ishlari davom etmoqda.
Ayni paytda ham tuman hokimligi va “G‘ijduvon dehqon bozori” rahbariyati tomonidan tadbirkorlar bilan muloqotlar o‘tkazilib, ularga tegishli tushuntirishlar berib, ularning muammolari bartaraf qilish choralari ko‘rilib, ularga savdo madaniyatini yuksaltirish lozimligi ta’kidlanmoqda. Bozor ma’muriy binosi oldidagi avtoturargoh va yo‘llarda tuman hokimligi, sektor rahbarlari, huquqni muhofaza qiluvchi organlar ko‘magida tadbirkorlar bilan tushintirish targ‘ibot ishlarining olib borilishi natijasida Yusuf Hamadoniy va XXI asr ko‘chalarida tartib o‘rnatildi.
Shu o‘rinda ma’lumot uchun ta’kidlash joizki, ijtimoiy tarmoqda ta’kidlanganidek 187 ta yengil tipdagi vaqtincha qurilgan savdo do‘koni to‘liq buzilishga tushgan. Bu manzildagi sotuvchilar uchun yuqorida aytilgan pavilyonlarda yetarlicha joy hozirlangan. Gap faqat ularning ijara to‘lovlarini kelishib, savdo faoliyatini yo‘lga qo‘yishlariga bog‘liq.
Buxoro viloyat hokimligi
Izoh (0)