Xitoyning Pekin shahrida odam salomatligi bilan bog‘liq favqulodda vaziyatga e’tibor qaratishning eng yuqori darajasi (“I”) e’lon qilindi. “Kommersant”ning yozishicha, bu haqda shahar sog‘liqni saqlash qo‘mitasi rahbari Ley Xaychao ma’lum qilgan. Hukumat yangi koronavirus tarqalgani sababli shunday qarorga kelgan.
Ley Xaychaoning ta’kidlashicha, hozirda Pekinda koronavirus bilan kasallanish bo‘yicha 29 ta tasdiqlangan holat qayd etilgan. Bemorlardan biri og‘ir ahvolda, qolganlarning ahvoli qoniqarli deb baholanmoqda.
Eslatib o‘tamiz, koronavirus keltirib chiqargan pnevmoniya oqibatida vafot etganlar soni 25 kishiga yetdi, kasallanganlar soni 800 nafardan oshdi.
Koronavirus tufayli Xitoyda 13 ta shahar yopib qo‘yildi. Ularning eng yirigi Uxan bo‘lib, kasallik dastlab 12 million aholiga ega aynan shu shaharda paydo bo‘lgan. AQSh, Yaponiya, Janubiy Koreya, Vyetnam, Tailand, Singapur, Gonkong, Makao va Tayvanda ham kasallanish holati qayd etilgan.
Izoh (0)